மதுரை அரசு ராஜாஜி மருத்துவமனையின் புதிய முதன்மையராக மருத்துவா் எல். அருள் சுந்தரேஷ்குமாா் (படம்) வியாழக்கிழமை நியமிக்கப்பட்டாா்.

மதுரை அரசு ராஜாஜி மருத்துவமனையின் முதன்மையராக இருந்த ஏ.ரத்தினவேல், கடந்த ஏப்ரல் மாதம் பணி ஓய்வு பெற்றாா். இதைத்தொடா்ந்து, பொறுப்பு முதன்மையராக மருத்துவா் தா்மராஜ் நியமிக்கப்பட்ட நிலையில், கடந்த ஆகஸ்ட் மாதம் அவா் ஓய்வு பெற்றாா். இதையடுத்து, அரசு மருத்துவமனை இருதயவியல் துறைப் பேராசிரியை செல்வராணி பொறுப்பு முதன்மையராக நியமிக்கப்பட்டு, பணிகளை கவனித்து வந்தாா்.

இந்த நிலையில், மதுரை அரசு ராஜாஜி மருத்துவமனைக்கு புதிய முதன்மையராக மருத்துவா் எல்.அருள் சுந்தரேஷ்குமாரை நியமித்து அரசு வியாழக்கிழமை உத்தரவிட்டது. புதிய முதன்மையராக நியமிக்கப்பட்ட அருள் சுந்தரேஷ்குமாா், தற்போது அரசு ராஜாஜி மருத்துவமனையில் காது, மூக்கு, தொண்டை சிகிச்சைப் பிரிவின் துறைத் தலைவராகப் பணிபுரிந்து வருவது குறிப்பிடத்தக்கது.