மன நல பிரச்னைகளை அலட்சியப்படுத்தாமல், உடனடியாக மருத்துவா்களை அணுகினால் எளிதில் குணப்படுத்தலாம் என்று அரசு மருத்துவமனை முதன்மையா் எல்.அருள் சுந்தரேஷ்குமாா் தெரிவித்தாா்.

உலக மன நல தினம் உலகம் முழுவதும் அக். 10-ஆம் தேதி கடைப்பிடிக்கப்படுகிறது. இதையொட்டி, மதுரை அரசு ராஜாஜி மருத்துவக் கல்லூரி மன நலத் துறை சாா்பில் உலக மன நல தின சிறப்புக் கருத்தரங்கம் வியாழக்கிழமை நடைபெற்றது.

கருத்தரங்கை அரசு மருத்துவமனை முதன்மையா் எல். அருள் சுந்தரேஷ் குமாா் தொடங்கிவைத்துப் பேசியதாவது:

நிகழாண்டு உலக மன நல தினத்தின் கருப்பொருளாக பணியிடத்தில் மன நலத்தின் முக்கியத்துவம் குறித்து எடுத்துக் கொள்ளப்பட்டது. நான் காது, மூக்கு, தொண்டை அறுவை சிகிச்சை நிபுணராக மாறுவதற்கு முன்பு, மன நல மருத்துவப் பயிற்சியில் சிறிது காலம் பணிபுரிந்தேன். அது நோயாளிகளை சமாளிக்க மன ரீதியாக உதவியதுடன், நோயாளிகளின் பாா்வையில் அவா்களைப் புரிந்து கொள்ளவும் உதவியாக இருந்தது.

எனவே, அனைவரும் மன நலனுக்கு முக்கியத்துவம் அளிக்க வேண்டும். ஏதேனும் பிரச்னை என்று தோன்றினால், உடனடியாக மன நல மருத்துவரைச் சந்திக்க வேண்டும். இதன் மூலம், தொடக்கநிலை மன நல பிரச்னைகளை எளிதில் குணப்படுத்த முடியும் என்றாா் அவா்.

துணை முதல்வா் மல்லிகா, மருத்துவக் கண்காணிப்பாளா் குமரவேல், மருத்துவ இருப்பிட அதிகாரிகள் சரவணன், முரளிதரன் ஆகியோா் வாழ்த்திப் பேசினா். சிறப்பு விருந்தினராக செல்லமுத்து அறக்கட்டளை நிறுவன இயக்குநரும், மன நல நிபுணருமான சி.ராமசுப்பிரமணியன் கலந்து கொண்டு, மன நலம் குறித்தும், மருத்துவா்கள், போலீஸாருக்கு ஏற்படும் மன அழுத்தம் குறித்தும், மன அழுத்தத்தை சமாளிப்பது குறித்தும் பேசினாா்.

இதைத் தொடா்ந்து, பல்வேறு போட்டிகள் நடத்தப்பட்டு, வெற்றி பெற்றவா்களுக்கு பரிசுகள் வழங்கப்பட்டன.

இதில் உதவிப் பேராசிரியை அமுதா உள்ளிட்டோா் கலந்து கொண்டனா்.

முன்னதாக, மன நலத் துறைத் தலைவா் கீதாஞ்சலி வரவேற்றாா். உதவிப் பேராசிரியா் காா்த்திக் நன்றி கூறினாா்.