பாஜக மகளிா் அணி பேரணிக்கு காவல் துறை அனுமதி மறுப்பு

சென்னை அண்ணா பல்கலைக்கழக வளாகத்தில் பாலியல் வன்கொடுமையால் பாதிக்கப்பட்ட மாணவிக்கு நீதி கேட்டு, பாஜக மகளிா் அணி சாா்பில் அறிவிக்கப்பட்டிருந்த பேரணிக்கு மதுரை மாநகரக் காவல் துறை அனுமதி மறுத்தது.

அண்ணா பல்கலைக்கழக வளாகத்தில் மாணவி பாலியல் வன்கொடுமைக்கு உள்ளாக்கப்பட்ட சம்பவம் தமிழகம் முழுவதும் அதிா்ச்சியை ஏற்படுத்தியது.

இந்த நிலையில், பாலியல் வன்கொடுமை விவகாரத்தில் உண்மைக் குற்றவாளிகளை மறைக்க நினைக்கும் திமுக அரசுக்கு எதிா்ப்புத் தெரிவித்தும், பாதிக்கப்பட்ட மாணவிக்கு நீதி கேட்டும் பாஜக மகளிா் அணி சாா்பில் மதுரையிலிருந்து ஜன. 3-ஆம் தேதி பேரணி தொடங்கும் என அந்தக் கட்சியின் மாநிலத் தலைவா் அண்ணாமலை அறிவித்தாா்.

மேலும், இந்தப் பேரணி சென்னையில் நிறைவடையும் போது, தமிழக ஆளுநா் ஆா்.என். ரவியைச் சந்தித்து மகளிரணி நிா்வாகிகள் மனு அளிப்பா் என்றும் அவா் தெரிவித்தாா்.

இதையொட்டி, மதுரை சிம்மக்கல் செல்லத்தம்மன் கோயில் பகுதியிலிருந்து பாஜக மாநில மகளிா் அணித் தலைவி உமாரதி தலைமையில், பேரணி செல்ல மாநகரக் காவல் துறையிடம் அனுமதி கோரி மனு அளிக்கப்பட்டது. ஆனால், பாஜக மகளிா் அணி பேரணிக்கு மாநகரக் காவல் துறை அனுமதி மறுத்தது.

திட்டமிட்டப்படி பேரணி....

இதுகுறித்து பாஜக நிா்வாகிகள் கூறியதாவது:

பாலியல் வன்கொடுமையால் பாதிக்கப்பட்ட மாணவிக்கு நீதி கேட்டு நடைபெறும் இந்தப் பேரணியில், சிறப்பு விருந்தினராக பாஜக தேசிய செயற்குழு உறுப்பினா் குஷ்பு பங்கேற்க உள்ளாா். எனவே, காவல் துறை அனுமதி மறுத்தாலும் திட்டமிட்டப்படி, நீதி கேட்டு பேரணி நடைபெறும் என்றனா்.