கம்பத்தில் வாா்டு பணிகளை கவுன்சிலா் தொடக்கம்

தேனி மாவட்டம், கம்பம் நகராட்சியில் 16 ஆவது வாா்டில் போட்டியிட்டு வெற்றி பெற்ற திமுக உறுப்பினா், தனது பகுதியில் குடிநீா் குழாய் பதிக்கும் பணிகளை வியாழக்கிழமை தொடக்கி வைத்தாா்.

கம்பத்தில் நடந்து முடிந்துள்ள நகா்மன்றத் தோ்தலில் 16 ஆவது வாா்டில் திமுக சாா்பில் போட்டியிட்டு வென்ற கோ. சம்பத்குமாா், தனது வாா்டுக்கு சென்று புதன்கிழமை நன்றி தெரிவித்தாா். அப்போது, நந்தகோபாலன் தெரு மக்கள், பகிா்மானக் குழாய் அமைக்குமாறு கோரிக்கை விடுத்தனா். அதன்பேரில், அவா் நகராட்சி ஆணையா் பாலமுருகனிடம் இது குறித்து தகவல் தெரிவித்துள்ளாா்.

உடனே, ஆணையா் பொறியியல் பிரிவுக்கு தகவல் தெரிவித்தன்பேரில், அப்பகுதியில் வியாழக்கிழமை 93 மீட்டா் நீளத்துக்கு பகிா்மானக் குழாய் பதிக்கும் பணிகள் தொடங்கப்பட்டன. இதனால், பொதுமக்கள் மகிழ்ச்சி அடைந்தனா்.