அனுமதியின்றி சரவெடி தயாரித்த இளைஞா் கைது

விருதுநகா் மாவட்டம் ஸ்ரீவில்லிபுத்தூா் அருகே அனுமதியின்றி சரவெடி தயாரித்ததாக இளைஞரை போலீஸாா் புதன்கிழமை கைது செய்தனா்.

ஸ்ரீவில்லிபுத்தூா் அருகே உள்ளது முத்துலிங்காபுரம் பகுதியில் உள்ள ஒரு தோட்டத்தில் இயங்காத கோழிப்பண்ணையில் அனுமதி இல்லாமல் சரவெடி தயாரிப்பதாக மல்லி வருவாய் துறையினருக்குத் தகவல் கிடைத்தது.

அதன்பேரில் மல்லி வருவாய் ஆய்வாளா் ரமேஷ் மற்றும் அதிகாரிகள் அங்கு சென்று சோதனை நடத்தியபோது அனுமதியின்றி சரவெடி தயாரித்தது தெரியவந்தது. இதையடுத்து அங்கிருந்த சரவெடி பண்டல்கள், 3 பைகளில் இருந்த 53 கிலோ உதிரி வெடிகள் ஆகியவை பறிமுதல் செய்யப்பட்டன.

இது குறித்த புகாரின் பேரில் சண்முகசுந்தரபுரத்தைச் சோ்ந்த காளிமுத்து மகன் அய்யனாா் (30) என்பவரை மல்லி போலீஸாா் கைது செய்தனா்.