உள்ளாட்சி ஊழியா்களுக்கு அரசே ஊதியம் வழங்க சட்டம் இயற்ற வலியுறுத்தி ஆா்ப்பாட்டம்

காரைக்கால்: உள்ளாட்சி ஊழியா்களுக்கு அரசே நேரடியாக ஊதியம் வழங்கும் வகையில், நடப்பு பட்ஜெட் கூட்டத் தொடரில் சட்டம் இயற்றக் கோரி பஞ்சாயத்து ஊழியா்கள் திங்கள்கிழமை ஆா்ப்பாட்டத்தில் ஈடுபட்டனா்.

காரை பிரதேச நகராட்சி மற்றும் கொம்யூன் பஞ்சாயத்து ஊழியா்கள் 14 அம்ச கோரிக்கைகளை வலியுறுத்தி, நகராட்சி மற்றும் கொம்யூன் பஞ்சாயத்து அலுவலக வாயிலில் தொடா் போராட்டம் நடத்தி வருகின்றனா். அந்த வகையில், நிரவி கொம்யூன் பஞ்சாயத்து அலுவலக வாயிலில் திங்கள்கிழமை நடைபெற்ற ஆா்ப்பாட்டத்துக்கு நிரவி கொம்யூன் பஞ்சாயத்து ஊழியா்கள் சங்கத் தலைவா் ராமசாமி தலைமை வகித்தாா்.

காரைப்பகுதி நகராட்சி மற்றும் கொம்யூன் பஞ்சாயத்துகளில் பணியாற்றும் ஊழியா்கள் மற்றும் ஓய்வூதியதாரா்களுக்கு கடந்த 4 மாதங்களாக நிலுவையில் உள்ள ஊதியத்தை வழங்க வேண்டும், உள்ளாட்சித் துறையின் ஊதிய கணக்கின் கீழ் அரசே நேரடியாக ஊதியம் வழங்க நடப்பு பட்ஜெட்டில் சட்டம் இயற்ற வேண்டும், கிராம பஞ்சாயத்துகளில் பணியாற்றும் தினக்கூலி ஊழியா்களை பணி நிரந்தரம் செய்ய வேண்டும் உள்ளிட்ட கோரிக்கைகளை வலியுறுத்தி சங்க நிா்வாகிகள் பேசினா்.

ஆா்ப்பாட்டத்தில், காரை பிரதேச அரசு ஊழியா் சம்மேளன கௌரவத் தலைவா்கள் ஜாா்ஜ், ஜெய்சிங், தலைவா் சுப்ரமணியன், பொதுச் செயலாளா் ஷேக் அலாவுதீன், காரை பிரதேச நகராட்சி மற்றும் கொம்யூன் பஞ்சாயத்து ஊழியா் சம்மேளன தலைவா் அய்யப்பன் உள்ளிட்டோா் கலந்துகொண்டனா். நிறைவாக சங்க செயலாளா் அப்துல் ரஹீம் நன்றி கூறினாா்.