காரைக்கால் மருத்துவமனையில் இன்று சிறப்பு மருத்துவா்கள் பங்கேற்கும் முகாம்

காரைக்கால் அரசுப் பொது மருத்துவமனைக்கு வெள்ளிக்கிழமை (மே 6) புதுச்சேரியிலிருந்து சிறப்பு மருத்துவா்கள் வரவுள்ளனா்.

இதுகுறித்து காரைக்கால் மாவட்ட ஆட்சியா் அலுவலகம் வியாழக்கிழமை வெளியிட்ட செய்திக் குறிப்பு: புதுச்சேரி அரசுப் பொது மருத்துவமனையிலிருந்து சிறப்பு மருத்துவக் குழுவினா், ஒவ்வொரு மாதமும் 2 வெள்ளிக்கிழமைகளில் காரைக்கால் அரசுப் பொது மருத்துவமனைக்கு வந்து, பொதுமக்களுக்கு சிகிச்சை அளிக்கின்றனா்.

இதன் ஒருபகுதியாக 6 ஆம் தேதி குழந்தை அறுவைச் சிகிச்சை, சிறுநீரகவியல் மற்றும் நரம்பியல், இருதயம் சம்பந்தமான மருத்துவ நிபுணா் குழுவினா் காரைக்கால் அரசுப் பொது மருத்துவமனைக்கு வரவுள்ளனா். காலை 9 முதல் பகல் 12 மணி வரை இம்முகாம் நடைபெறுகிறது. இதை பொதுமக்கள் பயன்படுத்திக்கொள்ளலாம்.