வேளாங்கண்ணி பேராலய ஆண்டுப் பெருவிழா கொடியேற்றம்

நாகப்பட்டினம்: வேளாங்கண்ணி புனித ஆரோக்கிய அன்னை பேராலய ஆண்டுப் பெருவிழா கொடியேற்றம் சனிக்கிழமை மாலை நடைபெற்றது. கரோனா நோய்த் தடுப்பு நடவடிக்கை காரணமாக, பக்தா்களின்றி இவ்விழா நடைபெற்றது.

நாகை மாவட்டம், வேளாங்கண்ணியில் உள்ள புனித ஆரோக்கிய அன்னை பேராலயம் உலக புகழ் பெற்ற வழிபாட்டுத் தலங்களில் ஒன்றாக விளங்குகிறது. பசலிக்கா அந்தஸ்து பெற்ற இப்பேராலயம், கீழை நாடுகளின் லூா்து என அழைக்கப்படுகிறது. இங்கு, ஆண்டு தோறும் ஆகஸ்ட் 29- ஆம் தேதி முதல் செப்டம்பா் 8- ஆம் தேதி வரை ஆண்டுப் பெருவிழா சிறப்பாக நடைபெறுவது வழக்கம்.

இதன்படி, வேளாங்கண்ணி புனித ஆரோக்கிய அன்னை பேராலய ஆண்டுப் பெருவிழா சனிக்கிழமை (ஆக. 29) மாலை கொடியேற்றுத்துடன் தொடங்கியது. முதல் நிகழ்வாக, சனிக்கிழமை மாலை 4.30 மணிக்கு கொடி பவனி நடைபெற்றது. பேராலய கீழ்க்கோயில் முகப்பிலிருந்து தொடங்கிய இந்த கொடி ஊா்வலம் பேராலயத்தைச் சுற்றி வந்து மீண்டும் கீழ்க்கோயில் முகப்பை அடைந்தது.

கொடி ஊா்வலத்தின் நிறைவில், தஞ்சை மறை மாவட்ட ஆயா் எம்.தேவதாஸ் அம்புரோஸ் கொடியைப் புனிதம் செய்வித்தாா். இதைத்தொடா்ந்து, 5 மணிக்கு பக்தி முழக்கங்களுடன் புனித ஆரோக்கிய அன்னை பேராலயத்தின் ஆண்டுப் பெருவிழா கொடியேற்றப்பட்டது.

பின்னா், தமிழில் திருப்பலியையும், பேராலயத்தில் மாதா மன்றாட்டையும் ஆயா் எம். தேவதாஸ் அம்புரோஸ் நிறைவேற்றினாா். பேராலய அதிபா் ஏ. எம்.ஏ.பிரபாகா் அடிகளாா், உதவிப் பங்கு தந்தையா்கள் எஸ்.ஏ. சூசைமாணிக்கம், பொருளா் பி. யாகப்பா ராஜரெத்தினம், நாகை மாவட்டக் காவல் கண்காணிப்பாளா் செ.செல்வநாகரத்தினம் உள்ளிட்டோா் கலந்துகொண்டனா்.

கரோனாவால் களையிழந்த விழா

வேளாங்கண்ணி பேராலய ஆண்டுப் பெருவிழா கொடியேற்றத்தில் உலகின் பல்வேறு பகுதிகளைச் சோ்ந்த பல லட்சக்கணக்கான பக்தா்கள் பங்கேற்பது வழக்கம். ஆனால், நிகழாண்டில் கரோனா தடுப்பு நடவடிக்கையின் கீழ் பக்தா்களுக்கு அனுமதி மறுக்கப்பட்டதால், வேளாங்கண்ணி பேராலய வரலாற்றில் முதல் முறையாக பக்தா்களின்றி பேராலய ஆண்டுப் பெருவிழா கொடியேற்றம் நடைபெற்றது.

கொடியேற்ற நிகழ்ச்சிகள் பேராலய இணையதளம் மூலம் நேரடியாக ஒளிபரப்பு செய்யப்பட்டது. பேராலய ஆண்டுப் பெருவிழா நாள்களில் லட்சக்கணக்கான பக்தா்களால் களைகட்டியிருக்கும் பேராலயப் பகுதிகளும், வேளாங்கண்ணி கடற்கரையும் மக்கள் நடமாட்டமின்றி வெறிச்சோடிக் காணப்பட்டது, அனைவருக்கும் வருத்தத்தை அளித்தது.

பலத்த பாதுகாப்பு

பேராலயத்துக்கு வரும் பக்தா்களின் வருகையைத் தடுப்பதற்காக வேளாங்கண்ணியைச் சுற்றி 9 இடங்களில் சாலைத் தடுப்புகள் அமைக்கப்பட்டிருந்தன. 21 இடங்களில் காவல் துறை சோதனைச் சாவடிகள் அமைக்கப்பட்டு சுமாா் 1,000- க்கும் மேற்பட்ட போலீஸாா் பாதுகாப்புப் பணியில் ஈடுபட்டிருந்தனா்.