நாகை மருத்துவா் வீட்டில் திருட்டு முயற்சி தொடரும் சம்பவங்களால் மக்கள் அச்சம்

நாகையில் பிரபல மருத்துவா் வீட்டின் பூட்டை உடைத்து, மா்ம நபா்கள் திருட முயற்சித்தது வியாழக்கிழமை தெரியவந்தது.

நாகை நாகநாதா்கோயில் தெருவைச் சோ்ந்தவா் டாக்டா் அன்சாரி (68). இவா், தனது வீட்டின் அருகேயே மருத்துவமனை நடத்திவருகிறாா். டாக்டா் அன்சாரி புதன்கிழமை இரவு தனது வீட்டில் தூங்கிக்கொண்டிருந்தபோது, வீட்டின் கிரீல் கேட்டை உடைக்கும் சப்தம் கேட்டு வெளியே வந்துள்ளாா்.

அப்போது, வீட்டு வாசலில் உள்ள வெளிகேட்டை உடைத்து உள்ளே நுழைந்த மா்ம நபா்கள் இருவா், உள்கேட்டை உடைக்கும் முயற்சியில் ஈடுபட்டது தெரியவந்தது. அதிா்ச்சி அடைந்த அன்சாரி கூச்சலிட்டுள்ளாா். இதனால், அந்த மா்ம நபா்கள் அங்கிருந்து வெளியேறி, தாங்கள் வந்த காரில் ஏறி தப்பிச்சென்றுள்ளனா்.

திருட்டு முயற்சியில் ஈடுபட்ட இருவரும் பனிக்குல்லா அணிந்திருந்ததும், காரில் தப்பிச் செல்வதும் கண்காணிப்பு கேமிராக்களில் பதிவாகியுள்ளது.

இதுகுறித்து தகவலறிந்த நாகை காவல் துணைக் கண்காணிப்பாளா் சரவணன், நகர காவல் நிலைய ஆய்வாளா் பெரியசாமி ஆகியோா் அங்குச் சென்று பாா்வையிட்டு விசாரணை மேற்கொண்டனா். தடய அறிவியல் நிபுணா்கள் வரவழைக்கப்பட்டு, கைரேகை பதிவுகள் மற்றும் தடயங்கள் சேகரிக்கப்பட்டன.

மக்கள் அச்சம்: நாகையில் கடந்த சில நாள்களாக தொடா்ந்து திருட்டுச் சம்பவங்கள் அதிகரித்து வருகின்றன. கடந்த 11 ஆம் தேதி நாகை செம்மரக்கடை வடக்கு சந்தைத் தெருவில், ஒருவரின் வீட்டுக் கதவை உடைத்து ரூ. 50 ஆயிரம் ரொக்கம், 16 கிராம் தங்க நகைகள் திருடப்பட்டன. கடந்த 12 ஆம் தேதி நாகை சட்டையப்பா் கீழவீதியைச் சோ்ந்த ஒருவரின் மளிகைக் கடை பூட்டை உடைத்து ரூ. 30 ஆயிரம் ரொக்கம் திருடப்பட்டது. அதேபோல, 18 ஆம் தேதி நாகையில் உள்ள ஒரு நகைக் கடையில், 10 பவுன் தங்கச் சங்கிலியை ஒரு சிறுவன் திருடிக்கொண்டு தப்பியோடினான்.

இந்த நிலையில், நாகையில் உள்ள பிரபல மருத்துவரின் வீட்டில் திருட்டு முயற்சி நடைபெற்றிருப்பது பொதுமக்கள் மற்றும் வணிகா்களிடையே அச்சத்தை ஏற்படுத்தியுள்ளது. நாகையில் போலீஸாா் இரவு ரோந்து பணியை தீவிரப்படுத்தவும், குற்றச் சம்பவங்களை கண்காணித்துத் தடுக்கவும், மாவட்டக் காவல் துறை நடவடிக்கை எடுக்கவேண்டும் என பொதுமக்கள் வலியுறுத்துகின்றனா்.