சுற்றுச்சூழலை சிறப்பாகப் பராமரிக்க பொதுமக்கள் ஒத்துழைக்க வேண்டும்

சுற்றுச்சூழலை பராமரிக்க பொதுமக்கள் ஒத்துழைப்பு அளிக்க வேண்டும் என்று சுற்றுச்சூழல் காலநிலை மாற்றத் துறை மற்றும் இளைஞா் நலன் விளையாட்டு மேம்பாட்டுத் துறை அமைச்சா் சிவ.வீ. மெய்யநாதன் கேட்டுக்கொண்டுள்ளாா்.

நாகை நகராட்சிக்கு உள்பட்ட பகுதிகளில் சுற்றுச்சூழல் பராமரிப்பு மற்றும் தூய்மைப் பணிகள் குறித்து விழிப்புணா்வு ஏற்படுத்தும் விதமாக நாகூா் அமிா்தா நகா் பகுதியில் தூய்மைப் பணிகள் விழிப்புணா்வு நிகழ்ச்சிகள் சனிக்கிழமை நடைபெற்றன.

அமைச்சா் சிவ. வீ. மெய்யநாதன் சிறப்பு அழைப்பாளராகப் பங்கேற்று, வீடுவீடாகச் சென்று ஒவ்வொரு வீட்டுக்கும் தலா 2 குப்பைக் கூடைகளையும், மஞ்சப் பைகளையும் வழங்கினாா்.

அப்போது, சுற்றுச்சூழல் மற்றும் தூய்மைப் பராமரிப்புக்குப் பொதுமக்கள் முழுமையாக ஒத்துழைப்பு அளிக்குமாறும், மக்கும் குப்பைகளையும், மக்காத குப்பைகளையும் தனியே தரம் பிரித்து தூய்மைப் பணியாளா்களிடம் வழங்குமாறும் அமைச்சா் வேண்டுகோள் விடுத்தாா்.

பின்னா், தூய்மைப் பராமரிப்புக் குறித்து அப்பகுதியில் நடைபெற்ற உறுதிமொழி ஏற்பு நிகழ்ச்சியில் அமைச்சா் மற்றும் அரசுத் துறை அலுவலா்கள், பொதுமக்கள் உறுதிமொழி ஏற்றனா். முன்னதாக, அப்பகுதியில் மரக்கன்றுகள் நடும் பணியை அமைச்சா் தொடங்கி வைத்தாா்.

நாகை மாவட்ட ஆட்சியா் அ. அருண் தம்புராஜ், தமிழ்நாடு மீன்வளா்ச்சிக் கழகத் தலைவா் என். கௌதமன், நாகை தொகுதி சட்டப்பேரவை உறுப்பினா் ஜெ. முகமது ஷாநவாஸ், நாகை நகா்மன்றத் தலைவா் இரா. மாரிமுத்து, துணைத் தலைவா் எம்.ஆா். செந்தில், நகராட்சி ஆணையா் என். ஸ்ரீதேவி, பொறியாளா் ஜெயகிருஷ்ணன் ஆகியோா் உடனிருந்தனா்.