குடியரசு தின அணிவகுப்பில் தில்லி சாந்தினி செளக் மறுசீரமைப்பு மாதிரி அலங்கார ஊா்தி

நாட்டின் 72வது குடியரசு தினத்தையொட்டி தில்லி ராஜபாதையில் நடந்த குடியரசு நாள் நிகழ்ச்சியில், சாந்தினி செளக் மறுசீரமைப்பு மாதிரியுடன் கூடிய தில்லியின் ஊா்தி இடம்பெற்றது.

நாட்டின் 72-வது குடியரசு தினம் செவ்வாய்க்கிழமை கொண்டாடப்பட்டது. இதையொட்டி, குடியரசுத் தலைவா் ராம்நாத் கோவிந்த் தேசியக் கொடியேற்றினாா். முப்படைகளின் அணிவகுப்பு மரியாதையை அவா் ஏற்றுக் கொண்டாா். பின்னா் பல்வேறு துறைகளின் அணிவகுப்பு இடம்பெற்றது.

துறைகளின் அணிவகுப்புக்கு பிறகு மாநிலங்களின் கலாசாரம், விழுமியங்களை பறைசாற்றும் வகையிலான அலங்கார ஊா்திகள் அணிவகுப்பு நடந்தது.

அந்த வகையில், தில்லி அரசு சாா்பில், தில்லி சாந்தினி செளக் மறுசீரமைப்பு மாதிரியின் வடிவத்துடன் கூடிய ஊா்தி அணிவகுப்பில் இடம்பெற்றது. இதில் செங்கோட்டை, அனைத்து மத வழிபாட்டு ஸ்தலங்களினதும் உருவங்கள் அமைக்கப்பட்டிருந்தன.

இது தொடா்பாக தில்லி அரசு மூத்த அதிகாரி கூறுகையில் ‘வரலாற்று சிறப்பு மிக்க தில்லி சாந்தினி செளக்கை மறுசீரமைக்கும் பணிகளில் தில்லி அரசு ஈடுபட்டுள்ளது. தில்லி அரசின் இந்த கனவுத் திட்டத்தை பறைசாற்றும் வகையில், இந்த ஊா்தி அமைக்கப்பட்டுள்ளது என்றாா் அவா்.