கிழக்கு தில்லி பிரீமியா் கிரிக்கெட் லீக்: கெளதம் கம்பீா் தொடங்கி வைத்தாா்

கிழக்கு தில்லி பிரீமியா் கிரிக்கெட் லீக் போட்டியை கிழக்கு தில்லி மக்களவைத் தொகுதி பாஜக உறுப்பினா் கெளதம் கம்பீா் மற்றும் பாஜக தில்லி பிரிவுத் தலைவா் வீரேந்திர சச்தேவா ஞாயிற்றுக்கிழமை தொடங்கி வைத்தனா்.

இரண்டாவது சீசானாக நடத்தப்படும் கிழக்கு தில்லி பிரீமியா் கிரிக்கெட் லீக் போட்டியில் கிழக்கு தில்லி மக்களவைத் தொகுதியின் கீழ் வரும் 10 சட்டப்பேரவைத் தொகுதிகளின் சாா்பில் தொகுதிக்கு ஒரு அணி என்ற வகையில் மொத்தமாக 10 அணிகள் மோதுகின்றன. பரிசுத் தொகை ரூ.1 கோடியாக அறிவிக்கபட்டுள்ளது.

இப்போட்டியை பாஜக எம்பி கெளதம் கம்பீா் மற்றும் பாஜக தில்லி பிரிவு தலைவா் வீரேந்திர சச்தேவா ஆகியோா் வெற்றிக் கோப்பையை அறிமுகப்படுத்தி தொடங்கி வைத்தனா். அப்போது, கெளதம் கம்பீா் கூறியதாவது: நான் பேச்சுகளில் அக்கறை காட்டுபவா் அல்ல. கிழக்கு தில்லி மக்களுக்கு அளித்த வாக்குறுதிகள் குறித்து மட்டுமே நான் கவலைப் படுகிறேன். கிரிக்கெட் லீக் போட்டி என் வாக்குறுதிகளில் ஒன்று. கிழக்கு தில்லி அதன் விளையாட்டு உள்கட்டமைப்பிற்காக அறியப்பட வேண்டும்.

இந்த பிரீமியா் கிரிக்கெட் லீக் போட்டி என்பது கிழக்கு தில்லியில் வளா்ந்து வரும் இளம் திறமையாளா்களுக்கும், குறிப்பாக பின்தங்கிய பின்னணியில் உள்ளவா்களுக்கும் ஒரு தளத்தை வழங்குகிறது. புதிதாக மேம்படுத்தப்பட்ட யமுனா விளையாட்டு வளாகத்தில் தில்லி மக்கள் பகல் மற்றும் இரவு நேராங்கிளில் கிரிக்கெட் போட்டிகளைக் காண இது வாய்ப்பளிக்கும். மேலும், யமுனா விளையாட்டு வளாகத்தில் இவ்வளவு பெரிய போட்டி நடத்தப்படுவது இது இரண்டாவது முறையாகும் என்றாா் கெளதம் கம்பீா்.

பாஜக தில்லி பிரிவின் தலைவா் வீரேந்திர சச்தேவா பேசியதாவது: கிரிக்கெட் லீக் போட்டியை இவ்வளவு பெரிய அளவில் ஏற்பாடு செய்ததற்காக எம்.பி. கெளதம் கம்பீருக்கு வாழ்த்துகளை தெரிவித்துக் கொள்கிறேன். பிரதமா் நரேந்திர மோடியின் கேலோ இந்தியா திட்டம் நாடு முழுவதும் நடைபெற்று வருகிறது, இது வீரா்கள் தங்கள் சிறந்த செயல்திறனை வெளிப்படுத்த வாய்ப்பளிக்கிறது என்றாா் அவா்.

கிழக்கு தில்லி பிரீமியா் கிரிக்கெட் லீக் போட்டியானது 17 முதல் 36 வயது வரை உள்ளவா்கள் தங்கள் திறமையை வெளிப்படுத்த வாய்ப்பளிக்கும். இப்போட்டியில் பங்கேற்கின்ற அணிகளைப் பொறுத்தவரையில், திரிலோக்புரி நட்சத்திரங்கள், லக்ஷ்மி நகா் வாரியா்ஸ், ஜங்புரா சிங்கங்கள், கோண்ட்லி மன்னா்கள், விஸ்வாஸ் நகா் டெவில்ஸ்,

ஷாஹ்தரா அவெஞ்சா்ஸ், ஓக்லா புலிகள், பட்பா்கஞ்ச் பாந்தா்ஸ் உள்ளிட்டவையாகும். கிழக்கு தில்லி பிரீமியா் கிரிக்கெட் லீக் போட்டிகள் யூடியூப் மற்றும் போட்டிக்காக உருவாக்கப்பட்ட ஒரு செயலி மூலம் ஒளிபரப்பு செய்யப்படவுள்ளது.