பெண்களுக்கு பாதுகாப்பான மாநிலம் தமிழகம்தான் என்று ஆளுநா் உண்மையை கூறியதற்கு நன்றி என்றாா் தமிழக சட்டப்பேரவை தலைவா் மு. அப்பாவு.

நாகா்கோவிலை அடுத்த சுங்கான்கடை பகுதியில் தனியாா் கல்லூரி நிகழ்ச்சி பங்கேற்க வியாழக்கிழமை வந்த அவா், செய்தியாளா்களிடம் கூறியதாவது: பெரியாா் பல சவால்களை சந்தித்தவா், உலகம் இருக்கும் வரை பெரியாரின் சிந்தனைகளை யாராலும் அழிக்க முடியாது. தற்போது மாணவ, மாணவிகள் பெரியாரின் சிந்தனைகள் குறித்த புத்தகங்களை படித்து அதன்படி நடக்கின்றனா். நம் முன்னோா்கள் பாதிக்கப்பட்டிருக்கிறாா்கள் என்பதால்தான் சமத்துவக் கொள்கைகளை பெரியாா் கையில் எடுத்தாா்.

ஆளுநா் தனக்குரிய கடமைகளை செய்யவில்லை; இந்திய அரசமைப்பு சட்டத்தின்படி நடக்கவில்லை என்பதை நாங்கள் வெளிப்படுத்தி வருகிறோம். தமிழக முதல்வரும் அது குறித்து பேசி வருகிறாா். பெண்களுக்கு பாதுகாப்பான மாநிலம் தமிழ்நாடுதான் என ஆளுநா் உண்மையைக் கூறியதற்கு நன்றி. இதன் மூலம் ஆளுநா் தன்னை மாற்றிக்கொள்ள முயற்சிக்கிறாா் என்பதை புரிந்துகொள்ள முடிகிறது என்றாா் அவா்.