சாத்தான்குளம் மாா்ட்டின் கொலை வழக்கு:கைதானவா்களின் உறவினா்களிடம் விசாரணை

சாத்தான்குளம் மாா்ட்டின் கொலை வழக்கு தொடா்பாக கைதானவா்களின் உறவினா்களிடம் திருச்செந்தூா் கோட்டாட்சியா் கோகிலா வியாழக்கிழமை விசாரணை நடத்தினாா்.

சாத்தான்குளத்தில் கடந்த மாதம் 10-ஆம் தேதி மாா்ட்டின் கொலை செய்யப்பட்ட வழக்கு தொடா்பாக மாவட்ட எஸ்பி ஜெயக்குமாா் தலைமையில் 5 தனிப்படை போலீஸாா் விசாரணை நடத்தி 8 பேரை கைது செய்தனா். மேலும் 3பேரை தேடி வருகின்றனா்.

இந்நிலையில் இந்து முன்னணி, பாஜகவினா் இக்கொலையில் கூலிபடையினா் சம்பந்தப்பட்டிருப்பதாக குற்றச்சாட்டி வந்தனா். இந் நிலையில் திருச்செந்தூா் கோட்டாட்சியா் கோகிலா தலைமையிலான அதிகாரிகள் வியாழக்கிழமை மாா்ட்டின் கொலை வழக்கில் தொடா்புடையதாக கைது செய்யப்பட்டவா்களின் உறவினா்களிடம், அவா்களது வீட்டிற்கு சென்று விசாரணை நடத்தினாா்.

இவ்வழக்கில் கைது செய்யப்பட்ட குற்றவாளிகளின் தன்மை, வேறு ஏதாவது அமைப்பில் தொடா்பில் உள்ளாா்களா எனவும், அவா்கள் மீது குண்டா் தடுப்புச் சட்டத்தின் கீழ் கைது செய்ய பரிந்துரைக்கப்பட்டுள்ளது குறித்தும் கோட்டாட்சியா் கோகிலா தலைமையிலான அதிகாரிகள் விசாரணை நடத்தி வருவதாகவும், அதிகாரிகள் தரப்பில் தெரிவிக்கப்பட்டது.