திருச்சி: உலக மாற்றுத்திறனாளிகள் தினத்தை முன்னிட்டு, தஞ்சையைச் சோ்ந்த செவித்திறன், பாா்வைத்திறன் குறைபாடு உள்ள மாணவ, மாணவிகள் திருச்சியிலிருந்து சென்னைக்கு விமானத்தில் செவ்வாய்க்கிழமை பயணம் செய்து மகிழ்ந்தனா்.

மாற்றுத்திறனாளிகள் நலத்துறையின் மூலம் ஒவ்வொரு ஆண்டும் டிசம்பா் 3-ஆம் தேதி உலக மாற்றுத்திறனாளிகள் தினம் அனுசரிக்கப்பட்டு வருகிறது.

இந்த ஆண்டு இந்தத் தினத்தை சிறப்பாக கொண்டாடும்விதமாக மாற்றுத்திறன் மாணவா்களுக்கு மறக்க முடியாத அனுபவத்தை அளிக்க ஏற்பாடு செய்யப்பட்து.

இதன்படி, தஞ்சாவூா் மாவட்ட அரசு பாா்வைத்திறன் மற்றும் செவித்திறன் குறையுடையோருக்கான அரசு சிறப்புப் பள்ளிகளில் 11-ஆம் வகுப்பு பயின்று வரும் மாணவா்களை பாதுகாவலருடன் திருச்சியிலிருந்து விமானம் மூலம் சென்னை அழைத்து சென்று அங்கு மெட்ரோ ரயில் அனுபவம் மற்றும் திரையரங்கத்தில் படம் பாா்க்க ஏற்பாடுகள் செய்யப்பட்டுள்ளன.

இதன்படி, திருச்சி விமான நிலையத்துக்கு செவ்வாய்க்கிழமை வந்த தஞ்சாவூா் மாவட்ட பாா்வைத் திறன் குறைபாடுடைய 17 மாணவா்கள் மற்றும் 4 பாா்வைத் திறன் சிறப்பாசிரியா்கள், செவித்திறன் குறையுடையோருக்கான பள்ளியின் 10 மாணவா்கள் 3 மாணவிகள், 2 சிறப்பாசிரியா்கள் என மொத்தம் 36 பேரை

ஆட்சியா் வே. சரவணன் வரவேற்று கலந்துரையாடினாா். பின்னா், மாணவா்கள் மற்றும் ஆசிரியா்களை திருச்சி விமான நிலையத்திலிருந்து விமானம் மூலம் சென்னைக்கு வழியனுப்பி வைத்தாா்.

இந்நிகழ்வில், மாவட்ட மாற்றுத்திறனாளிகள் நல அலுவலா்கள் அருள் பிரகாசம் (தஞ்சாவூா்), இரா. ரவிச்சந்திரன்(திருச்சி) உள்ளிட்டோா் பங்கேற்றனா்.