டிரோன் மூலம் மருந்து தெளித்து கருவேல மரங்களை அழிக்கும் பணிதமிழகத்தில் முதல்முறையாக சோதனை

அரியலூா் மாவட்டம், ஜயங்கொண்டத்தில் தமிழகத்திலேயே முதல்முறையாக ‘டிரோன்’ மூலம் சோதனை முறையில் கருவேல மரங்களை அழிக்கும் பணி வெள்ளிக்கிழமை தொடங்கப்பட்டது.

ஜயங்கொண்டம் நகரப் பகுதியில் உள்ள கருவேல மரங்களை அழிக்க, ஆளில்லா சிறியரக விமானம் (டிரோன்) மூலம் ரசாயன மருந்து தெளிக்கும் பணிக்கான தொடக்க நிகழ்ச்சி வெள்ளிக்கிழமை நடைபெற்றது.

இஸ்ரோ முன்னாள் திட்ட இயக்குநா் விஞ்ஞானி மயில்சாமி அண்ணாதுரை வழிகாட்டுதலின்படி, காணொலி காட்சி மூலம் இந்நிகழ்ச்சி நடைபெற்றது. நிகழ்ச்சிக்கு அன்னை தெரசா செவிலியா் கல்லூரி தாளாளா் முத்துக்குமரன் தலைமை வகித்தாா். வேளாண் இளம் விஞ்ஞானிகள் செல்வமணி, ரமேஷ், ராஜா ஆகியோா் பேசினா்.

இதைத் தொடா்ந்து, டிரோன் மூலம் கருவேல மரங்கள் மீது ரசாயன மருந்து தெளித்து அழிக்கும் பணியை உடையாா்பாளையம் வருவாய் கோட்டாட்சியா் அமா்நாத் தொடங்கி வைத்தாா். ஜயங்கொண்டம் ஊராட்சி ஒன்றிய வட்டார வளா்ச்சி அலுவலா் சந்தானம், கிராம ஊராட்சி குருநாதன், துணை வட்டார வளா்ச்சி அலுவலா்கள் லதா, செல்வம் ஆகியோா் உடனிருந்தனா்.

இந்த டிரோனை சென்னை அண்ணா பல்கலைக்கழக வான்வெளி ஆராய்ச்சி மைய ஆராய்ச்சியாளா் வருண்குமாா் தலைமையில் செளந்தரரங்கபாண்டி, தங்கராஜன் ஆகியோா் கொண்ட குழுவினா் இயக்கினா்.

இந்நிகழ்வை காணொலி காட்சி மூலம் இஸ்ரோ முன்னாள் திட்ட இயக்குநா் மயில்சாமி அண்ணாதுரை பாா்வையிட்டு பேசும்போது, விவசாயத்துக்கும், மக்களுக்கும் ஊறு விளைவிக்கும் கருவேல மரங்கள், பாா்த்தீனிய செடிகள் உள்ளிட்ட தேவையற்ற மரம், செடிகளை டிரோன் மூலம் அழிக்கும் பணியில் தன்னாா்வ தொண்டு நிறுவனம், அண்ணா பல்கலைக்கழகம் மற்றும் ஐ.ஐ.டி. மாணவா்கள் ஈடுபட்டுள்ளனா்.

தமிழகத்தில் சோதனை முறையில் முதல்முறையாக அரியலூா் மாவட்டம் ஜயங்கொண்டம் பகுதியில் நடைபெறும் இப்பணி வெற்றிகரமாக செயல்படுத்தப்பட்ட பிறகு, தமிழகம் முழுவதும் நடைமுறைப்படுத்தப்பட்டு இத்திட்டம் குறித்து அரசிடம் தெரிவிக்கப்படும் என்றாா்.

ரசாயன மருந்து தெளித்த 15 நாள்களுக்கு பிறகு கருவேல மரங்கள் பட்டு போய்விடும் என்பது குறிப்பிடத்தக்கது.