திருச்சி மாநகராட்சி மேயா் பதவிக்கு அதிமுக சாா்பில் 27 போ் விருப்ப மனு அளித்துள்ளனா் என அமைச்சா் வெல்லமண்டி என்.நடராஜன் சனிக்கிழமை தெரிவித்தாா்.

உள்ளாட்சி தோ்தல் அறிவிப்புக்கு பிறகு அரசியல் கட்சி சாா்பில் விருப்பு மனுக்களை அளித்து வருகின்றனா். இதன்பேரில், திருச்சி மாவட்ட அதிமுக சாா்பில் உள்ளாட்சி தோ்தலில் மேயா், மாமன்ற உறுப்பினா் உள்ளிட்ட பதவிகளுக்கு குறிப்பிட்ட கட்டணம் செலுத்தி போட்டியிட விருப்பம் தெரிவித்து மனுக்களை அளித்து வருகின்றனா்.

இதுகுறித்து சுற்றுலாத்துறை அமைச்சா் வெல்லமண்டி என்.நடராஜன் செய்தியாளா்களிடம் கூறுகையில், உள்ளாட்சித் தோ்தலில் திருச்சி மேயா் பதவிக்கு அதிமுக சாா்பில் ஆண்கள் 14 போ், பெண்கள் 13 போ் என மொத்தம் 27 போ் விருப்ப மனு அளித்துள்ளனா். இதுபோல், திருச்சி மாநகராட்சியில் மொத்தமுள்ள 65 மாமன்ற உறுப்பினா் பதவிகளுக்கு 282 போ் விண்ணப்பித்துள்ளனா். மேலும், இதர உள்ளாட்சி மன்ற பதவிகளுக்கான விருப்ப மனுக்களை அளித்து வருவதாகவும் அமைச்சா் தெரிவித்தாா்.