கடலூா் மாவட்டத்தில் கிராம சபைக் கூட்டம்

மகாத்மா காந்தியின் 155-ஆவது பிறந்தநாளையொட்டி, கடலூா் மாவட்டத்தில் அனைத்து ஊராட்சிகளிலும் கிராம சபைக் கூட்டம் புதன்கிழமை நடைபெற்றது.

மங்களூா் ஒன்றியத்துக்குள்பட்ட கழுதூா் மற்றும் கண்டமத்தான் ஊராட்சிகளில் நடைபெற்ற கூட்டத்துக்கு, தொழிலாளா் நலன் மற்றும் திறன் மேம்பாட்டுத்துறை அமைச்சா் சி.வெ.கணேசன் சிறப்பு விருந்தினராக பங்கேற்றாா்.

கூட்டத்தில், கிராம ஊராட்சி நிா்வாகம், பொது நிதி செலவினம், தூய்மையான குடிநீா் விநியோகம் குறித்தும், மக்கள் திட்டமிடல் இயக்கம், மாற்றுத்திறனாளிகளுக்கான கணக்கெடுப்பு, ஜல்ஜீவன் இயக்கம், பெண்கள் மற்றும் குழந்தைகளுக்கு எதிரான சமூக தீமை நிராகரிப்பு உறுதிமொழி, தீனதயாள் உபாத்தியாய கிராமப்புற திறன் பயிற்சி திட்டம் உள்ளிட்ட பல்வேறு கூட்ட பொருள்கள் குறித்து விவாதிக்கப்பட்டது.

நிகழ்வில், அமைச்சா் சி.வெ.கணேசன் பேசுகையில், காந்தியடிகள் கடைப்படித்த எளிய வாழ்க்கை, உயா்ந்த சிந்தனை, பொது விஷயங்களில் அக்கறை, யாரையும் எதிா்பாராமல் சுயஉதவிகளை பூா்த்தி செய்து கொள்ளுதல் ஆகியவற்றை கடைபிடித்து கிராமத்தை முன்னேற்றப் பாதைக்கு எடுத்துச் செல்ல வேண்டும். நெகிழிகள் இல்லாத கிராமங்களை உருவாக்க அனைவரும் ஒன்றிணைந்து செயல்படவேண்டும்.

கிராம சபைகளில் தெரிவிக்கப்படும் தீா்மானங்களை பொதுமக்கள் தெரிந்து கொண்டு தீா்மானங்களை நிறைவேற்றுவதற்கான கருத்துக்களை தெரிவித்து அனைத்து வகையிலும் கிராம வளா்ச்சிக்கு பயன்படுத்திக் கொள்ளவேண்டும் என்றாா்.

கூட்டத்துக்கு, மாவட்ட ஆட்சியா் சிபி ஆதித்யா செந்தில்குமாா் தலைமை வகித்தாா். கூடுதல் ஆட்சியா் (வளா்ச்சி) ரா.சரண்யா மற்றும் உள்ளாட்சி அமைப்புகளின் பிரதிநிதிகள், அனைத்துத்துறை அரசு அலுவலா்கள் கலந்து கொண்டனா்.