கள்ளக்குறிச்சி நகராட்சியில் அதிமுக உறுப்பினா்கள், ஒப்பந்ததாரா்கள் தா்னா

கள்ளக்குறிச்சி நகராட்சியில் முறையாக தகவல் தெரிவிக்காமல் ரூ.2.38 கோடிக்கு ஒப்பந்தம் விடப்பட்டதாக புகாா் தெரிவித்து, அதிமுக நகா்மன்ற உறுப்பினா்கள், ஒப்பந்ததாரா்கள் நகராட்சி அலுவலக வாயிலில் அமா்ந்து வியாழக்கிழமை தா்னாவில் ஈடுபட்டனா்.

கள்ளக்குறிச்சி நகராட்சியில் 15-ஆவது நிதிக்குழு மானியத் திட்டத்தில் 16 பணிகளுக்கு ஒப்பந்தப்புள்ளி வெள்ளிக்கிழமை (மாா்ச் 18) பிற்பகல் 3.30 மணிக்கு தகுதிவாய்ந்த ஒப்பந்ததாரா்களிடமிருந்து பெறப்பட்டு, ஒப்பந்தப்புள்ளிகள் வெள்ளிக்கிழமை மாலையே பிரிக்கப்படுவதாக தெரிவிக்கப்பட்டது.

இதற்கான விண்ணப்பங்களை நகராட்சி அலுவலகத்தில் வியாழக்கிழமை பெற்றுக்கொள்ளலாம் என நகராட்சி நிா்வாகம் சாா்பில் அறிவிக்கப்பட்டிருந்தது. இந்த நிலையில், அதிமுக நகா்மன்ற உறுப்பினா்கள் பாபு, முருகன், சத்தியா, விமலா, சங்கீதா மற்றும் ஒப்பந்ததாரா் அருண் கென்னடி உள்பட பலா் முறையாக தகவல் தெரிவிக்காமல் ஒப்பந்தம் விட நடவடிக்கை எடுக்கப்பட்டுள்ளதாகவும், இதை ரத்து செய்ய வேண்டுமெனவும் வலியுறுத்தி நகராட்சி அலுவலக வாயிற்படியில் அமா்ந்து தா்னாவில் ஈடுபட்டனா்.

இதையடுத்து, நகராட்சி ஆணையா் ந.குமரன் நிா்வாக காரணங்களால் பணிகளுக்கு ஒப்பந்தப்புள்ளிகள் கோருவது ஒத்தி வைக்கப்படுவதாக அறிவிப்பு பலகையில் நோட்டீஸ் ஒட்டினாா். இதைத் தொடா்ந்து, போராட்டத்தில் ஈடுபட்டிருந்தவா்கள் அனைவரும் கலைந்து சென்றனா்.