19-வது சர்வதேச யோகா திருவிழா தொடக்கம்

புதுச்சேரியில் 19-வது சர்வதேச யோகா திருவிழா வெள்ளிக்கிழமை தொடங்கியது.

புதுச்சேரி சுற்றுலாத்துறை சார்பில் ஏற்பாடு செய்யப்பட்டிருந்த இந்த திருவிழாவைத் தொடங்கி வைத்து, முதல்வர் என்.ரங்கசாமி பேசியது:

  நோயற்ற வாழ்வு வாழ்வதற்கு யோகாசனம் மிக முக்கியம். யோகாசனம் கற்றுக் கொண்டால் உடல் சீராக இருக்கும்.

பல சித்தர்கள் வாழ்ந்த பூமி புதுச்சேரி. இங்கு யோகாசனம் கற்க பல்வேறு நாடுகளில் இருந்து வருகின்றனர். அதனால், புதுச்சேரியில் தொடர்ந்து 19-வது ஆண்டாக இந்த யோகா திருவிழா நடத்தப்படுகிறது.

நாட்டிலேயே சிறிய மாநிலமாக இருந்தாலும், சுற்றுலாவில் சிறந்து விளங்குகிறது. மாநிலத்தின் சொந்த வருவாயை உயர்த்த வேண்டிய கட்டாயத்தில் நாம் இருக்கிறோம். அதற்காக இதுபோன்ற திருவிழாக்களை நடத்துவதன் மூலம், அதிகமான சுற்றுலாப் பயணிகள் இங்கு வருகின்றனர்.

இதற்காக, பண்டைய கட்டடங்கள் பாதுகாக்கப்பட்டு வருகின்றன. இதுவரை 72 கட்டடங்களை பழைமையானவை என அறிவித்து, அவற்றைப் பாதுகாக்க ஒவ்வொரு ஆண்டும் நிதியுதவி அளிக்கப்படுகிறது.

தானே புயலில் சீர்குலைந்த அழகை மீட்க, மரம் நடும் திட்டத்தைத் தொடங்கி நடைபெற்று வருகிறது. சாலைகளைச் சீராக்கி அழகுபடுத்த, பொதுப்பணித்துறை மூலம் பல்வேறு பணிகள் நடைபெற்று வருகின்றன.

சுற்றுலாத்துறை மூலம் மாநிலத்தின் அதிகபட்ச வருவாய் ஈட்டப்பட வேண்டுமென்பதில், அத்துறையின் மூலம் சுற்றுலாவை மேம்படுத்தத் தேவையான பணிகளில் அரசு தொடர்ந்து கவனம் செலுத்தும் என்றார் அவர்.

அமைச்சர் பெ.ராஜவேலு, சுற்றுலா மேம்பாட்டுத்துறை தலைவர் வையாபுரி மணிகண்டன், வீட்டுவசதி வாரியத் தலைவர் வெங்கடேசன், சுற்றுலாத்துறைச் செயலர் டபிள்யு.வி.ஆர்.மூர்த்தி, இயக்குநர் ஏ.எஸ்.சிவக்குமார் உள்ளிட்டோர் பங்கேற்றனர்.

  வரும் 7-ம் தேதி வரை இந்த யோகா திருவிழா நடைபெறுகிறது. மகாத்மாகாந்தி சாலை சுப்புலட்சுமிமஹால், கடற்கரை காந்தி திடல் ஆகிய இடங்களில் தினசரி காலை முதல் இரவு வரை யோகாசனப் பயிற்சிகள், போட்டிகள் நடத்தப்படுகின்றன.

 இதில் பல்வேறு நாடுகளைச் சேர்ந்த போட்டியாளர்கள் பங்கேற்கின்றனர். ஜனவரி 7-ம் தேதி மாலையில் பரிசளிப்பு விழா நடைபெறுகிறது.