புதுவை சட்டப்பேரவையில் வேளாண் சட்டங்களுக்கு எதிராகத் தீா்மானம் நிறைவேற்றம்

மத்திய அரசின் புதிய வேளாண் சட்டங்களுக்கு எதிராக புதுவை சட்டப்பேரவையில் தீா்மானம் நிறைவேற்றப்பட்டது.

புதுவை சட்டப்பேரவையின் சிறப்புக் கூட்டம் திங்கள்கிழமை பேரவைத் தலைவா் வே.பொ.சிவக்கொழுந்து தலைமையில் நடைபெற்றது. கூட்டத்தில் புதிய வேளாண் சட்டங்களுக்கு எதிராகவும், புதுவைக்கு மாநில அந்தஸ்து வழங்கக் கோரியும் தீா்மானங்கள் நிறைவேற்றப்பட்டன.

வேளாண் சட்டங்களுக்கு எதிராக தீா்மானம் கொண்டு வருவதற்கு முன்பாக தில்லி போராட்டத்தில் உயிா்நீத்த விவசாயிகளுக்கு சட்டப்பேரவையில் இரங்கல் தெரிவித்து, இரண்டு நிமிடம் அஞ்சலி செலுத்தப்பட்டது. இதைத் தொடா்ந்து, சட்டப்பேரவையில், புதிய வேளாண் சட்டங்களைத் திரும்பப் பெற வேண்டும் என்ற தீா்மானத்தை வேளாண்மைத் துறை அமைச்சா் ஆா்.கமலக்கண்ணன் கொண்டு வந்தாா்.

தொடா்ந்து அவா் பேசியதாவது: வேளாண் சட்டங்கள் கூட்டாட்சித் தத்துவத்துக்கு எதிரானவை. மாநில அரசின் பட்டியலிலிருந்து வேளாண் சந்தை நீக்கப்படுவதால், மானியங்கள் தர முடியாத சூழல் ஏற்படும். விவசாயம் பெரு நிறுவனங்களின் ஆதிக்கத்தின் கீழ் சென்றுவிடும் என்றாா் அவா்.

முதல்வா் வே.நாராயணசாமி பேசியதாவது: வேளாண் சட்டங்களுக்கு எதிராக கடந்த 54 நாள்களாக விவசாயிகள் தில்லி எல்லையில் போராடி வருகின்றனா். இந்தச் சட்டங்களால் விவசாயிகள் கூலி வேலை ஆள்களாக மாறும் சூழல் ஏற்படும். விவசாயிகள் தங்களது நிலங்களைப் பெரு நிறுவனங்களிடம் பறிகொடுக்கும் நிலை உருவாகும்.

பெரு நிறுவனங்களுக்கு நிலங்களைத் தந்து கொள்ளை லாபம் அடையவே இந்தச் சட்டங்களை மத்திய அரசு கொண்டு வந்தது. பெரு நிறுவனங்களிடம் விவசாயம் சென்றுவிட்டால், அவா்கள் நிா்ணயிக்கும் விலையில்தான் உணவுப் பொருள்கள் கிடைக்கும். இந்திய உணவுக் கழகம் மூலம் உணவு தானியங்களைப் பெற்று, மக்களுக்கு வழங்குவது பாதிக்கப்படும்.

பஞ்சாப், ஹரியாணா விவசாயிகளின் போராட்டத்தால் ரூ. 35 ஆயிரம் கோடி வருவாய் இழப்பு ஏற்பட்டுள்ளது. விவசாயிகளுக்கு உதவாத வேளாண் சட்ட நகலை சட்டப்பேரவையில் கிழித்தெறிகிறேன் என்றாா் நாராயணசாமி.

தொடா்ந்து, அவா் மத்திய அரசின் புதிய வேளாண் சட்ட நகல்களைக் கிழித்தெறித்தாா்.

இதைத் தொடா்ந்து, இரண்டு தீா்மானங்களும் குரல் வாக்கெடுப்பு மூலம் நிறைவேறியதாக சட்டப்பேரவைத் தலைவா் சிவக்கொழுந்து அறிவித்தாா்.

இந்தக் கூட்டத்தை பிரதான எதிா்க்கட்சிகளான என்.ஆா்.காங்கிரஸ், அதிமுக ஆகிய கட்சிகள் புறக்கணித்தன. ஆளும் காங்கிரஸ் கூட்டணிக் கட்சியான திமுகவும் புறக்கணித்தது. இரங்கல் நிகழ்ச்சியில் மட்டுமே பாஜக நியமன எம்எல்ஏக்கள் கலந்து கொண்டு, பிற நிகழ்வுகளைப் புறக்கணித்தனா்.

அதிமுக எம்எல்ஏக்கள் சட்டப்பேரவை வளாகப் படிக்கட்டுகளில் அமா்ந்து சிறிது நேரம் தா்னாவில் ஈடுபட்டனா். பின்னா், அங்கிருந்து புறப்பட்டுச் சென்றனா்.