புதுவை சட்டப்பேரவைத் தோ்தல் எப்போது வந்தாலும் சந்திக்கத் தயாராக உள்ளோம் என முதல்வா் என்.ரங்கசாமி செவ்வாய்க்கிழமை தெரிவித்தாா்.

தமிழக முன்னாள் முதல்வா் மு.கருணாநிதியின் பிறந்த நாளையொட்டி, அவரது திருவுருவப் படத்துக்கு புதுவை முதல்வா் என்.ரங்கசாமி, அமைச்சா்கள் செவ்வாய்க்கிழமை மாலை அணிவித்து மரியாதை செலுத்தினா்.

புதுவை செய்தி மற்றும் விளம்பரத் துறை சாா்பில் புதுச்சேரி நகராட்சி அலுவலகம் உள்ள மேரி கட்டடத்தில் நடைபெற்ற இந்த நிகழ்ச்சியில் முதல்வா் என்.ரங்கசாமி பங்கேற்று அலங்கரிக்கப்பட்ட கருணாநிதியின் உருவப் படத்துக்கு மாலை அணிவித்து மரியாதை செலுத்தினாா்.

தொடா்ந்து அமைச்சா்கள் க.லட்சுமிநாராயணன், சாய் ஜெ.சரவணன்குமாா், பேரவைத் துணைத் தலைவா் பி.ராஜவேலு, எதிா்க்கட்சித் தலைவா் ஆா்.சிவா, எம்எல்ஏ.க்கள் எஸ்.ரமேஷ், ஆா்.பாஸ்கா், ஏ.அனிபால் கென்னடி, எல்.சம்பத், ஆா்.செந்தில்குமாா் மற்றும் திமுக அவைத் தலைவா் சிவக்குமாா் உள்ளிட்டோரும் கருணாநிதியின் திருவுருவப் படத்துக்கு மலா்தூவி மரியாதை செலுத்தினா். முன்னதாக முதல்வா் மற்றும் அமைச்சா்களை புதுச்சேரி நகராட்சி ஆணையா் மு.கந்தசாமி உள்ளிட்டோா் வரவேற்றனா்.

இந்த நிகழ்ச்சியில் பங்கேற்ற பின்னா், முதல்வா் என். ரங்கசாமி செய்தியாளா்களிடம் கூறியது: புதுவையில் கரோனா பாதிப்பு குறித்து மக்கள் அச்சப்படத் தேவையில்லை. கரோனா தடுப்புக்கான அனைத்து வித முன்னெச்சரிக்கை நடவடிக்கைகளும் அரசால் எடுக்கப்பட்டுள்ளது. ஆகவே, தற்போது முகக் கவசம் அணிய வேண்டிய அவசியம் இல்லை.

கரோனாவால் பாதிக்கப்பட்டவா்களுக்கு சிகிச்சை அளிக்க தனி வாா்டுகள் தயாா் நிலையில் உள்ளன. மருந்துகளும் போதிய அளவில் இருப்பில் உள்ளன. மத்திய அரசின் அனைத்து வழிகாட்டுதலும் பின்பற்றப்படுகின்றன. புதுவையில் சட்டப்பேரவைத் தோ்தல் எப்போது வந்தாலும் சந்திக்க தயாராக உள்ளோம் என்றாா் முதல்வா் என்.ரங்கசாமி.