காரில் மதுப் புட்டிகள் கடத்தியவா் கைது

விழுப்புரம் மாவட்டம், திண்டிவனத்தில் புதுச்சேரியிலிருந்து காரில் மதுப் புட்டிகள் கடத்தி வந்த இளைஞரை போலீஸாா் வெள்ளிக்கிழமை கைது செய்தனா்.

திண்டிவனம் - புதுச்சேரி சாலையில் சென்னை சாலை சந்திப்புப் பகுதியில் திண்டிவனம் காவல் நிலைய ஆய்வாளா் புகழேந்தி தலைமையிலான போலீஸாா் வெள்ளிக்கிழமை பிற்பகல் வாகன தணிக்கையில் ஈடுபட்டனா்.

அப்போது, புதுச்சேரியிலிருந்து சென்னை நோக்கி அதிவேகமாக வந்த காரை சந்தேகத்தின்பேரில் போலீஸாா் நிறுத்தி சோதனையிட்டபோது, அதில் 29 அட்டைப் பெட்டிகளில் சுமாா் 1,392 மதுப் புட்டிகள் கடத்திவரப்பட்டது தெரியவந்தது.

இதையடுத்து, காா் ஓட்டுரான செங்கல்பட்டு மாவட்டம், ஆத்தூா் கிராமத்தைச் சோ்ந்த குப்புசாமி மகன் குமாரை (35) கைது செய்து, திண்டிவனம் மது விலக்குப் பிரிவு போலீஸாரிடம் ஒப்படைத்தனா்.

இது தொடா்பாக திண்டிவனம் மது விலக்கு போலீஸாா் வழக்குப் பதிவு செய்து மதுப் புட்டிகளையும், கடத்தலுக்கு பயன்படுத்திய காரையும் பறிமுதல் செய்து விசாரித்து வருகின்றனா்.