பாகுபலி 2 படத்துக்குப் பிறகு அர்ஜூன் ரெட்டி என்கிற மற்றொரு தெலுங்குப் படம் அனைவருடைய கவனத்தையும் ஈர்த்தது. விஜய் தேவரகொண்டா, ஷாலினி பாண்டே நடிப்பில் சந்தீப் வங்கா இயக்கியுள்ள படத்துக்கு நல்ல விமரிசனங்கள் கிடைத்தது மட்டுமல்லாமல் வசூலிலும் அசத்தியது.

இந்தப் படத்தின் தமிழ்  ரீமேக்கில் விக்ரம் மகன் துருவ் நடிக்கவுள்ளார். திரையுலகில் துருவ் அறிமுகமாகும் இப்படத்தை பிரபல இயக்குனர் பாலா இயக்கவுள்ளார். மலையாளப் படத் தயாரிப்பாளரான ஈ4 எண்டர்டெயிண்மெண்டைச் சேர்ந்த முகேஷ் மேத்தா இப்படத்தின் தயாரிப்பாளர்.

வர்மா என்கிற இப்படத்தின் தலைப்பும் முதல் தோற்றத்தின் போஸ்டரும் விக்ரமின் இன்ஸ்டகிராம் தளத்தில் நேற்று வெளியிடப்பட்டபோதும் இசையமைப்பாளரின் பெயர் குறித்த தகவல் எதுவும் அதில் இடம்பெறவில்லை. இதனால் இது குறித்த குழப்பம் இன்னும் நீடிக்கிறது. 

இந்தப் படத்தின் இசையமைப்பாளராக யுவன் சங்கர் ராஜா நியமிக்கப்படுவார் என்று பேசப்படுகிறது. பாலாவின் பெரும்பாலான படங்களுக்கு இளையராஜா தான் இசையமைத்துள்ளார். நந்தா, அவன் இவன் ஆகிய படங்களுக்கு மட்டும் யுவன் சங்கர் ராஜாவும் பரதேசி படத்துக்கு ஜிவி பிரகாஷும் இசையமைத்தார்கள். இந்நிலையில் அர்ஜூன் ரெட்டி தமிழ் ரீமேக் படத்துக்கு யுவன் இசையமைப்பார் என்றும் இதுகுறித்த தகவல் விரைவில் அதிகாரபூர்வமாக வெளியிடப்படும் என்றும் சொல்லப்படுகிறது.

ஆனால், அர்ஜூன் ரெட்டி போன்ற ஒரு காதல் படத்துக்கு ராஜாவின் இசை மிகவும் பொருத்தமாக இருக்கும். எனவே பாலா தனது ஆஸ்தான இசையமைப்பாளரையே இந்தப் படத்திலும் பயன்படுத்துவார் என்று இளையராஜாவின் ரசிகர்கள் ஆவலாக உள்ளார்கள். ரசிகர்களின் விருப்பம் நிறைவேறுமா?