அஜித் படத்தில் நடிகராக அறிமுகமாகிறார் ரங்கராஜ் பாண்டே!

தந்தி டிவியிலிருந்து சமீபத்தில் விலகியுள்ள பிரபல அரசியல் விமரிசகர் ரங்கராஜ் பாண்டே திரைத்துறையில் நுழைந்துள்ளார். 

சதுரங்க வேட்டை, தீரன் அதிகாரம் ஒன்று படங்களை இயக்கிய வினோத், அஜித்தின் அடுத்தப் படத்தை இயக்குகிறார். ஹிந்தியில் வெளியான பிங்க் படத்தின் ரீமேக்காக இந்தப் படம் உருவாகவுள்ளது. அமிதாப் பச்சன் நடித்த வேடத்தில் அஜித் நடிக்கவுள்ளார். இந்தப் படத்தை மறைந்த நடிகை ஸ்ரீதேவியின் கணவர் போனி கபூர் தயாரிக்கவுள்ளார். கடந்த வாரம் இப்படம் பூஜையுடன் தொடங்கியது.

இந்நிலையில் இந்தப் படத்தில் நடிகராக அறிமுகமாகிறார் ரங்கராஜ் பாண்டே. பிங்க் படத்தில் பியூஷ் மிஷ்ரா நடித்த வேடத்தில் ரங்கராஜ் பாண்டே நடிப்பார் என்று கூறப்படுகிறது. கடந்த வாரம்  நடைபெற்ற இப்படத்தின் பூஜை விழாவிலும் ரங்கராஜ் பாண்டே கலந்துகொண்டார். இப்படத்தில் தான் நடிப்பதை ட்விட்டரிலும் அவர் தெரிவித்துள்ளார்.