1996-ல் ஷங்கர் இயக்கத்தில் கமல் நடித்த இந்தியன் படம் பெரிய வெற்றியடைந்தது. இப்படத்தின் 2-ம் பாகம் தற்போது உருவாக்கப்பட்டு வருகிறது. கமல், காஜல் அகர்வால், சித்தார்த், ரகுல் ப்ரீத் சிங், வித்யுத் ஜமால், ஐஸ்வர்யா ராஜேஷ், ப்ரியா பவானி சங்கர் போன்றோர் இந்தியன் 2 படத்தில் நடிக்கிறார்கள். இசை - அனிருத், ஒளிப்பதிவு - ரத்னவேலு.

இந்நிலையில் இந்தப் படத்தின் நடிகர்கள் பட்டியலில் விவேக்கும் இணைந்துள்ளார். 32 வருடங்களாகத் தமிழ்த் திரையுலகில் நடித்து வரும் விவேக், இப்படத்தின் மூலம் முதல்முறையாக கமலுடன் இணைந்து நடிக்கிறார். இதுகுறித்து ட்விட்டரில் விவேக் கூறியதாவது:

நிகழும் வரை சொப்பனம்; நிகழும் போதோ பக்குவம். 32 ஆண்டுகள் தந்த நிதானம். முழுமையான ஈடுபாட்டுடன் உழைப்பதே இக்கணப் பிரதானம். எப்போதும் போல் உங்கள் ஆதரவை வேண்டுகிறேன். கமல் சாருக்கு என் அன்பு; ஷங்கர் அவர்களுக்கு என் நன்றி. லைக்காவுக்கு என் வாழ்த்துக்கள் என ட்வீட்டில் தன்னுடைய மகிழ்ச்சியைத் தெரிவித்துள்ளார்.