அமேசான் நிறுவனத்துடன் பல மில்லியன் டாலர் ஒப்பந்தம்: பிரியங்கா சோப்ரா மகிழ்ச்சி!

அமேசான் நிறுவனத்துடன் இரு வருட ஒப்பந்தத்தை மேற்கொண்டுள்ளார் பிரபல நடிகை பிரியங்கா சோப்ரா.

அமேசான் நிறுவனம் தயாரிக்கும் தொலைக்காட்சித் தொடர்களில் நடிக்க பல மில்லியன் டாலர் ஒப்பந்தத்தில் பிரியங்கா சோப்ரா கையெழுத்திட்டுள்ளதாகத் தகவல் வெளியாகியுள்ளது. இதை அமேசான், பிரியங்கா சோப்ரா என இரு தரப்பும் உறுதி செய்துள்ளது.

அமேசான் நிறுவனத்துக்கு உலக அளவில் வீச்சு உள்ளது. இதனால் அந்த நிறுவனத்துடன் இணைந்து பணியாற்றுவதில் மகிழ்ச்சியாக உள்ளேன். உலக அளவிலான ஒப்பந்தம் என்பதால் என்னால் இப்போது ஹிந்தியிலும் ஆங்கிலத்திலும் வேறு எந்த மொழியிலும் பணியாற்ற முடியும் என்று பிரியங்கா சோப்ரா கூறியுள்ளார்.

ஏற்கெனவே அமேசான் நிறுவனத்துடன் இணைந்து நடன நிகழ்ச்சி, ஓர் இணையத் தொடர் என இரு திட்டங்களில் ஈடுபட்டுள்ளார் பிரியங்கா சோப்ரா. தற்போது உலக அளவிலான ஒப்பந்தம் என்பதால் ஹிந்தி, ஆங்கிலம் என இரு மொழிகளிலும் பிரியங்கா சோப்ரா நடிக்கும் தொடரைத் தயாரிக்க முடியும். 

2002-ல் தமிழன் படம் மூலமாக நடிகையாக அறிமுகமான பிரியங்கா சோப்ரா, சமீபகாலமாக ஆங்கிலப் படங்கள் மற்றும் தொலைக்காட்சித் தொடர்களில் நடித்து உலகளவில் புகழ் பெற்றுள்ளார்.