லோகேஷ் இயக்கத்தில் விஜய் நடிக்கவிருக்கும் தளபதி 67 படத்தில் நடிக்கிறீர்களா? என நடிகர் கார்த்தியிடம் பத்திரிகையாளர்கள் கேள்வி எழுப்பினர். 

நடிகர் கார்த்தியின் சர்தார் திரைப்படம் தீபாவளியை முன்னிட்டு கடந்த 21 ஆம் தேதி வெளியாகி விமர்சகர்கள் மற்றும் ரசிகர்களைக் கவர்ந்து வெற்றிகரமாக ஓடிக்கொண்டிருக்கிறது. 

விருமன், பொன்னியின் செல்வன் படங்களுக்கு பிறகு இந்த ஆண்டில் நடிகர் கார்த்திக்கு சர்தார் 3வது வெற்றிப்படமாக அமைந்துள்ளது. இதனையடுத்து இயக்குநர் பி.எஸ்.மித்ரன், நடிகர் கார்த்தி, இசையமைப்பாளர் ஜி.வி.பிரகாஷ் ஆகியோர் பத்திரிகையாளர்களின் கேள்விக்கு பதிலளித்தனர். 

அப்போது கார்த்தி தனது படத்தின் அறிவிப்பு அடுத்த வாரம் வெளியாகும் என்றார். நடிகர் கார்த்தி அடுத்ததாக குக்கூ, ஜோக்கர் போன்ற படங்களை இயக்கிய ராஜு முருகன் இயக்கும் படத்தில் நடிக்கவிருக்கிறார் என்பது குறிப்பிடத்தக்கது. 

இதையும் படிக்க | 'இது 'வாரிசு' குடும்பம்': வைரலாகும் செல்ஃபி

மேலும் கைதி 2 படத்தின் படப்பிடிப்பு அடுத்த ஆண்டு துவங்கும் என்றும் கார்த்தி தெரிவித்தார்.  அப்போது தளபதி 67 படத்தில் நீங்கள் நடிக்கிறீர்களா? என பத்திரிகையாளர் ஒருவர் கேள்வி எழுப்பினார்.

அதற்கு பதிலளித்த அவர், ''எனக்கு தெரியலைங்க. இதுல நிறைய பிரச்னைகள் இருக்கின்றன. அவ்வளவு சுலபமாக செய்திட முடியாது. காரணம் இரண்டு படங்களுக்கும் வேறு வேறு தயாரிப்பாளர்கள். அதனால் இரண்டு பேரிடமும் அனுமதி பெற வேண்டியிருக்கும். நிறைய சிக்கல்கள் இருக்கின்றன. நாம் ஆசைப்படலாம். தயாரிப்பாளர்கள் பேசி சரி செய்யவேண்டும் என்று பதிலளித்தார்.