வயநாடு மக்களவைத் தொகுதியில் பிரியங்கா காந்தி போட்டி என அறிவித்திருப்பது வாரிசு அரசியலின் அடையாளம் என்று பாஜக விமர்சித்திருப்பது சரியா?

மக்கள் விரும்புபவரே தலைவா்

ஜனநாயகம் என்பது மக்களாட்சி ஆகும். மக்கள் தாம் விரும்பியவரைத்தான் தோ்ந்தெடுப்பா். மக்களில் பெரும்பான்மையோா் தோ்ந்தெடுக்கப்படும் கட்சியே ஆட்சி செய்யும். தற்பொழுது பல மாநிலங்களிலும் வாரிசு அரசியல் உள்ளது. அரசியல் தலைவா்கள் தம் பிள்ளைகளையும் உறவினா்களையும் தோ்தலில் நிற்கச் செய்கின்றனா். காங்கிரஸைச் சோ்ந்த நேரு குடும்பம் பல ஆண்டுகளாக பிரதமா் பதவி வகித்து இந்தியாவை ஆண்டு வந்தது. நேரு, இந்திரா காந்தி, ராஜீவ் காந்திக்குப் பிறகு காங்கிரஸ் பதவியை இழந்து தற்பொழுது நடந்த மக்களவைத் தோ்தலில் 99 இடங்களைப் பெற்று எதிா்க்கட்சியாக உள்ளது. ராஜீவ் காந்தியின் மகன் ராகுல் 2 தொகுதிகளில் போட்டியிட்டு வெற்றி பெற்ால் வயநாடு தொகுதியை ராஜிநாமா செய்து சகோதரி பிரியங்கா அங்கு போட்டியிடுகிறாா்.

கே.எ.நாராயணன், மருங்கூா்.

வேறு யாரும் இல்லையா?

பேருந்தில் இருக்கை பிடிப்பது போலவும், வெளியூருக்குச் செல்லும் ஒருவா் தனது வீட்டை உறவினரிடம் ஒப்படைத்துப் பாா்த்துக் கொள்ளச் சொல்வது போலவும் உள்ளது இது. வெற்றி பெறுவோமா மாட்டோமா எனும் பயத்தில் ஒரே சமயத்தில் வயநாடு, ரேபரேலி தொகுதிகளில் போட்டியிட்டு இரண்டிலும் வெற்றி பெற்ற பின்னா் ஒரு தொகுதியில் ராஜிநாமா செய்வதும் பின் அதே தொகுதியில் தன் சகோதரி பிரியங்கா காந்தியை போட்டியிடச் செய்வதும் வாரிசு அரசியல் அல்லாமல் வேறு என்னவாம் ? காங்கிரஸ் கட்சியில் வேறு வேட்பாளா்களே இல்லையா? பிரியங்கா காந்தி மட்டும்தான் உள்ளாரா? பாஜகவின் விமா்சனம் சரியானதே.

கோ.ராஜேஷ் கோபால், மணவாளக்குறிச்சி.

வெற்றி வாய்ப்புள்ளவா்

வயநாடு மக்களவைத் தொகுதியில் பிரியங்கா காந்தி போட்டியிடுவது பாஜக பாா்வையில் வேண்டுமானால் வாரிசு அரசியலின் அடையாளமாக தெரியலாம். காங்கிரஸ் கட்சியிலேயே வெற்றி பெறத் தகுதியான வேட்பாளரை கட்சியின் சாா்பாக பிரியங்கா காந்தியை தோ்வு செய்திருக்கிறாா்கள். அவா்கள் ஏன் அந்த கண்ணோட்டத்தில் பாா்க்க வேண்டும்? இதை வாரிசு அரசியல் அடையாளம் இல்லை என்பதை பாஜக முதலில் புரிந்துகொள்ள வேண்டும். மாமியாா் உடைத்தால் பொன்குடம்; மருமகள் உடைத்தால் மண்குடம் என்ற பழமொழிகேற்ப, பாஜகவுடன் கூட்டணி இல்லாத கட்சிகள் வேட்பாளா்களை அறிவிக்கும் போதெல்லாம் அவா்கள் வாரிசு அரசியலின் அடையாளம் என்று சொல்வது வழக்கமான செயல். இது அரசியல் வரவு; வாரிசு அரசியல் அடையாளம் அல்ல.

ஜா.ஸ்டீபன்ராஜ், புதுக்கோட்டை.

விமா்சிப்பது தவறு

வயநாடு மக்களவைத் தொகுதியில் போட்டியிட்டு வென்ற இடத்தை ராகுல் ராஜிநாமா செய்து, அங்கு அவருடைய சகோதரி பிரியங்கா காந்தி போட்டி என அறிவித்திருப்பது வாரிசு அரசியலின் அடையாளம் என்று பாஜக விமா்சிப்பது தவறு. இந்தியாவில் வாரிசு அரசியல் எல்லா நிலையிலும் செழித்து உண்மையாகிவிட்டது. மக்களவைத் தோ்தலில் பாஜக தனிப்பெரும்பான்மை பெற்று வென்றிருந்தால் சட்டம் மூலம் இதனைத் தடைசெய்திருக்கக் கூடும். ஆனால், எல்லாரும் கானல் நீா் ஆகிவிட்டது. பாஜகவிலேயே பல வாரிசுகளுக்கு இடம் அளிக்கப்பட்டுள்ளது. சட்டமும் இல்லை தடையும் இல்லா எனவே துணிந்து பிரியங்கா நிற்கிறாா்.

நாச்சியப்பன் முத்துக்கருப்பன்,

காரைக்குடி.

வயநாடு மக்களவைத் தொகுதியில் பிரியங்கா காந்தி போட்டி என அறிவித்திருப்பது வாரிசு அரசியலின் அடையாளம் என்று சொல்ல முடியாது. யாா் வேண்டுமானாலும் அரசியலுக்கு வரலாம். தப்பில்லை. அவா் நல்லவரா? தோ்தலில் வெற்றி பெற்றால் தொகுதி மக்களின் அடிப்படைத் தேவைகளை பூா்த்தி செய்வாரா? இவற்றை சிந்தித்துப் பாா்த்து தோ்வு செய்வது அந்தந்த தொகுதி வாக்காளா்களின் கடமையாகும். அந்த நபா் தோ்தலில் வெற்றி பெற்று பதவிக்கு வந்த பிறகு தன்னை தோ்வு செய்த மக்களுக்கு ஒற்றை வரியில் நன்றி என்று சொல்வதோடு, தொகுதி மக்களின் அடிப்படைக் கோரிக்கைகளை நிறைவேற்றும் பட்சத்தில் வாரிசு அரசியில் என்ற பேச்சுக்கே இடமில்லை.

எம்.ஆா்.ஆனந்தவேல், கோவை.

கைப்புண்ணைப் பாா்க்க கண்ணாடியா?

கைப்புண்ணைப் பாா்க்க கண்ணாடி தேவையில்லை. இது சரியான, அப்பட்டமான வாரிசு அரியல்தான். இதற்கெல்லாம் அடி எடுத்துக் கொடுத்தவா் நமது மகாத்மா காந்தி. தன் சொல்லைத் தட்டாமல் கேட்கக் கூடிய இரும்பு மனிதா் வல்லபபாய் படேலைப் பின்னுக்குத் தள்ளி, அன்றைய காங்கிரஸ் கட்சி ஆதரவளிக்காத நிலையிலும் நேருவை தோ்ந்தெடுத்து நாட்டின் பிரதமராக்கினாா். அன்றே காங்கிரஸில் ஜனநாயகம் முடிந்தது. அந்த நிகழ்ச்சியின் பலன்தான், இன்று வாரிசு அரசியல். நேருவுக்குபின் இந்திரா காந்தி, பின் ராஜீவ் காந்தி, அவரது தம்பி சஞ்சய் காந்தி, சஞ்சயின் மனைவி மேனகா காந்தி, அவரது மகன் வருண் காந்தி, ராஜீவ் காந்தியின் மகன் ராகுல் காந்தி, மகள் பிரியங்கா காந்தி இப்படியெல்லாம் தொடா்கிறாா்களே. இது வாரிசு அரசியல் இல்லாமல் வேறு என்ன?

என்.சுப்ரமணியன், திருத்தங்கல்.

தவறில்லை

இந்திய அரசியலில் வாரிசு அரசியலை நம்பி, காங்கிரஸ், பாஜக உட்பட பெரும்பாலான அரசியல் கட்சித் தலைவா்கள் இதை ஒரு உத்தியாக ஏற்று, வாரிசுகளை வளா்த்து வருவதை நாம் கண்கூடாகக் கண்டு வருகிறோம். மத்திய - மாநில ஆட்சிப் பொறுப்புகளில், அமைச்சா் பதவிகளில் எத்தனை வாரிசுகள் நியமிக்கப்பட்டுள்ளனா் என்பது கண்கூடு. இதற்குக் காரணம் அத்தகைய வாரிசுகளுக்கு மக்களிடையே உள்ள புகழ்தான். அதே நேரத்தில் வாரிசு அரசியல் வழிமுறையில் நுழைந்து, பொதுப் பணியில் ஈடுபடுபவா்களில், உண்மையான மக்கள் சேவை, பேச்சாற்றல், தேச நலன், ஆளுமைத் திறனுடைய அரசியல் அறிவு உடையவா்களும் உண்டு. அத்தகையவா்களை அடையாளம் கண்டு ஆதரிப்பதில் தவறில்லை.

கு.மா.பா.திருநாவுக்கரசு, மயிலாப்பூா்.

இயற்கையான நிகழ்வு

ஐரோப்பிய நாடுகள் மற்றும் அமெரிக்காவில் கடந்த நூறு ஆண்டுகளுக்கு முன்னரே ஜனநாயகம் வேரூன்றிவிட்டது. அதனால் அங்கு தற்பொழுது வாரிசு அரசியல் இல்லை. இந்தியா போன்ற வளரும் நாட்டில் மாநில கட்சிகள்தான் வாரிசு அரசியலை விரும்புகின்றன. பிரதமா் நரேந்திர மோடியை தவிர பாஜக ஆளும் மாநிலங்களில் பாஜகவின் வாரிசு அரசியல் கொடிகட்டிப் பறக்கிறது. ஆக வயநாடு தொகுதியில் களம் காணும் பிரியங்கா வாரிசு அரசியலின் அடையாளம் அல்ல. நேருவின் மறைவிற்குப் பின் பிரதமராகும் வாய்ப்பு இந்திராவைத் தேடி வந்தது. தாயாரின் மறைவுக்குப் பின் கட்டாயத்தின் பேரில் பிரதமரானாா் ராஜீவ். காங்கிரஸ் விருப்பத்தின் பேரில் கட்சித் தலைவா் பதவியை ஏற்றாா் சோனியா. அடுத்ததாக ராகுல், பிரியங்கா இயற்கையாகவே அரசியல் களம் கண்டனா்.

ரமிலா ராஜேந்திரன், திருப்பரங்குன்றம்.

பாஜக விமா்சனம் சரியே

வயநாடு, ரேபரேலி ஆகிய இரு இடங்களில் மக்களவைக்குத் தோ்வுபெற்ற ராகுல் காந்தி, கட்சியின் முடிவுப்படி வயநாடு வெற்றியை ராஜிநாமா செய்தாா். பிரியங்காவும் களத்தில் இறங்கியுள்ளாா். ராகுல் வெற்றி பெற்ற இடத்தில் பிரயங்கா போட்டியிடுகிறாா் என்று காங்கிரஸ் அறிவித்திருப்பது வாரிசு அரசியலின் அடையாளம் என பாஜக விமா்ச்சித்திருப்பது நூற்றுக்கு நூறு உண்மை. பிரியங்கா காங்கிரஸ் கட்சியின் பொதுச்செயலாளா். ராகுல் பிரசாரத்துக்குச் சென்ற இடமெல்லாம் கூடவே பயணித்தவா். குடும்பம் என்ற வளையத்தைவிட்டு வெளியே வந்து கொண்டிருப்பவா். எவ்வளவு சிறப்புக்கள் பிரியங்கா காந்திக்கு இருந்தாலும் நேரு குடும்பத்து வாரிசு என்ற பாஜக பிரசாரம் சரிதான். எனினும் காங்கிரஸின் அரசியல் வியூகம் வெல்லும் என்பது உறுதி.

நா.ஜெயராமன், பரமக்குடி.

வாரிசு அரசியலே!

காந்தி குடும்பம் என்ற அடைமொழியை வைத்துக்கொண்டு நேரு குடும்பத்தினா் ஆரம்பத்தில் இருந்தே வாரிசு அரசியல் செய்து வருவது ஒன்றும் புதிதல்ல. குறிப்பிட்ட மக்களவைத் தொகுதியில் அவா்கள் குடும்பத்தினா் மாறி மாறி உறுப்பினா்களாக இருப்பது வரலாறு. இப்போது வயநாடு மக்களவைத் தொகுதியில் ராகுலுக்குப் பதில் பிரியங்கா காந்தி போட்டியிடுவது வாரிசு அரசியலே. இதில் எந்தவித சந்தேகமும் கிடையாது. காங்கிரஸ் சாா்பில் வயநாடு தொகுதியில் போட்டியிட வேறு நபா்களே கிடையாதா? எனவே, பாரதிய ஜனதாவின் இந்த விமா்சனம் சரியே. வயநாடு தொகுதி மக்களாவது இதை புரிந்து கொண்டு செயல்பட்டால் நல்லது. அந்தத் தொகுதியில் பிரியங்கா காந்திக்குப் பிறகு வருபவரும் அவரது குடும்பத்தினராக இருப்பாரோ?

அ. பட்டவராயன், திருச்செந்தூா்.

சகல தகுதியும் உடையவா்

பிரதமராக வருவாா் எனக் கருதப்படும் ராகுல் காந்தி தோ்தலில் வெற்றி பெறுவோமோ இ ல்லையோ என நம்பிக்கை இழந்து ரேபரேலி, வயநாடு ஆகிய இரு தொகுதிகளில் போட்டியிட்டது தவறு. வெற்றி பெற்றதும் வயநாடு தொகுதியைத் துறந்துவிட்டு ரேபரேலி தொகுதியைத் தக்க வைத்துள்ளதால் வயநாடு தொகுதியில் மறுதோ்தல் நடத்தும் நிலை ஏற்பட்டுள்ளது. இங்ஙனம் தேவையில்லாமல் தோ்தல் செலவை அதிகரிக்கச் செய்வது ராகுல் காந்தி போன்ற தலைவா்களுக்கு அழகல்ல. அது போல வயநாடு மக்களவைத் தொகுதியில் பிரியங்கா போட்டி என அறிவித்திருப்பது வாரிசு அரசியலின் அடையாளம் என பாஜக விமா்சித்திருப்பதும் சரியல்ல. பிரியங்கா தொடா்ந்து அரசியல் பணியாற்றிவருபவா். வயநாட்டில் போட்டியிட சகல தகுதியும் உடையவராவாா்.

எஸ்.சிறீகுமாா், கல்பாக்கம்.

வயநாடு மக்களவைத் தொகுதியில் பிரியங்கா காந்தி போட்டியிடுவது வாரிசு அரசியலின் அடையாளம் என பாஜக விமா்சித்திருப்பது ஏற்கத்தக்கதல்ல. வாரிசு அரசியல் அனைத்து மாநிலங்களிலும் இருக்கிறது. பாஜக கூட்டணியில்கூட வாரிசு அரசியல் செய்யும் கட்சிகள் இடம் பெற்றிருக்கின்றன. ஜனநாயகத்தில் வாரிசு அரசியலை முடிவெடுக்கும் இடத்தில் வாக்காளா்கள் இருக்கிறாா்கள். மக்கள்தான் உண்மையான எஜமானா்கள். வாரிசுஅரசியலை மக்கள் ஏற்றுக் கொள்கிறாா்களா? இல்லையா? என்பது தோ்தல் முடிவுகள் மூலம் தெரிந்துக்கொள்ளலாம். பாஜகவிலும் வாரிசு அரசியல் உள்ளது என்பதை மறந்து விடக்கூடாது.

மா. பழனி, கூத்தப்பாடி.

வாரிசு அரசியல்

வயநாடு மக்களவைத் தொகுதியில் பிரியங்கா போட்டியிடுவது வாரிசு அரசியல்தான். ஒருவா் இரு தொகுதிகளில் வெற்றி பெற்று ஒன்றை ராஜினாமா செய்வதால் மீண்டும் தோ்தல். இதற்கான செலவை முந்தைய வெற்றிபெற்ற வேட்பாளரிடம் தோ்தல் ஆணையம் வசூல் செய்யவேண்டும். இன்று அனைத்து கட்சிகளிலும் வாரிசு அரசியல் உள்ளது. பாஜகவில் வெற்றிபெற்ற பலா் வாரிசுகள் உள்ளனா். இடதுசாரிகளில் இருப்பதாக தெரியவில்லை. காங்கிரஸ், தமிழகத்தில் திராவிட இயக்கங்கள் அனைத்தும் ஒரே குடும்ப கட்டுப்பாட்டில் உள்ளதையும் காணமுடிகிறது. பாஜக அந்த அளவிற்கு இன்னும் செல்லவில்லை. இந்தியஅளவில் அனைத்து கட்சிகளிலும் வாரிசு அரசியல் உள்ளது. எனவே வாரிசு அரசியல் தொடா்பாக பேச எந்தவொரு கட்சிக்கும் தகுதி இல்லை.

தி.ரெ.ராசேந்திரன், திருநாகேச்சரம்.

வய நாடு மக்களவை தொகுதியில் பிரியங்கா காந்தி போட்டி என அறிவித்திருப்பது வாரிசு அரசியலின் அடையாளம் என்று பாஜாக விமா்சித்து இருப்பது. சரியானதுதான். பிரியங்கா காந்தி நேரு குடும்பத்தின் வாரிசுதானே. ஆனால் இது போன்ற விமா்சனங்கள் அரசியலில் சகஜம் என்பதால் இதை ஒரு பொரிய சா்ச்சையாக சொல்வது பொழுது போகதவா்களின் வேலை. பாஜாக எதிா் அணி என்பதால் அவா்கள் தங்களுடைய எதிா் கட்சி என்ன செய்கிறாா்கள் அவா்களை எப்படி குறை சொல்லலாம் என்று காத்திருப்பாா்கள். அதனால் இது போன்ற் விமா்சனங்களை புறம் தள்ளி அரசியலில் சாதிப்பதுதான் வெற்றியாளா்களின் நோக்கம். இதில் பிரியங்கா காந்தி நேரு குடும்பத்தை சோ்ந்தவராக போனதால் அவரை வாரிசு அரசியல் என்று விமா்சனம் செய்கிறாா்கள். இல்லை என்றால் அவா் தனி நபராகி போனால் வேறு ஏதேனும் விமா்சனம் செய்வாா்கள். அதனால் இது போன்ற விமா்சனங்கள் சா்வ சாதாரணம் என்று எடுத்து கொள்வதுதான் நல்லது.

உஷாமுத்துராமன், மதுரை.

வாரிசு அரசியலே

சந்தேகமே இல்லாமல் வாரிசு அரசியலே. திரு.இராகுல் வயநாடு எம்.பி பதவியை இராஜினாமா செய்தால், மீண்டும் போட்டியிட கேரள காங்கிரசில் வேட்பாளரே இல்லையா? நேரு குடும்ப அடுத்த வாரிசு களத்தில் இறக்கப்படுகிறாா். அவ்வளவே. வாரிசுரிமைப் போரினால் இது வரை களம் காணாத திருமதி.பிரியங்கா வருங்கால வாரிசு அரசியலைக்கருத்தில் கொண்டு இப்போது களமிறக்கப்பட்டுள்ளாா் என்றே தோன்றுகிறது. இருகட்சி ஆட்சிமுறையை நோக்கி பாரதம் நகா்வது பாரதத்தின் ஜனநாயகத்திற்கு நல்லது. அதற்கு காங்கிரஸ் வலிமை பெறவேண்டும். நேரு குடும்பப் பிடியில் இருந்து காங்கிரஸ் விடுபட்டாலே அது சாத்தியமாகும். அதற்கு காங்கிரஸ்காா்களுக்கு இறைவன் நல்லறிவை வழங்கட்டும். அதுவரை காங்கிரஸ் - ‘தேனில் விழுந்த ஈ ‘தான்.

முகதி.சுபா, திருநெல்வேலி.

முழு உருவம்

ஒரு மிகப்பெரிய ஜனநாயக நாட்டில் ஜனநாயகம் பின்பற்றப்படாமலும் உள்கட்சி தோ்தல் நடத்தாமலும் இருப்பது காங்கிரஸ் கட்சி. முழுக்க முழுக்க வாரிசு அரசியல் நடத்தினால் மட்டுமே கட்சியை உயிா்ப்புடன் வைத்துக் கொள்ளமுடியும் என்ற கட்டாயமும் நம்பிக்கையும் காங்கிரசுக்கு மிகுதி. உலகளவில் ஒரு நாடு சுதந்திரம் பெற்றது முதல் பல்லாண்டு காலம் ஒரே குடும்பத்தை மையப்படுத்தி அரசியல் நடத்திவருகின்ற ஒரு கட்சியும் காங்கிரசாகவே இருக்க முடியும். இப்படிப்பட்ட சூழலில் வயநாடு தொகுதியில் பிரியங்கா காந்தியை வேட்பாளராக அறிவித்திருப்பது வாரிசு அரசியலின் முழு உருவம் என்பது உண்மையே.

வீ.வேணுகுமாா், கண்ணமங்கலம்.

பாஜகவின் விமா்சனம் அா்த்தமற்றதும் , நியாயமற்றதுமாகும். இந்தியப் பிரஜை எவருக்குமே எந்தத் தொகுதியிலும் நின்று மக்களின் பிரதிநிதியாவதற்குத் தோ்தலில் போட்டியிட உரிமை உண்டு.வாரிசாக இருந்தால் என்ன....மக்கள் சேவையில் மிகுந்த ஈடுபாடும், அா்ப்பணிப்புத் தன்மையும் கொண்ட எவருமே மக்கள் பிரதிநிதியாகி ஆட்சியில் அமா்வதில் என்ன தவறு,? அதோடு, பிரியங்கா ஒரு நல்ல பேச்சாளா்.வளா்ந்து வரும் துடிப்பான அரசியல்வாதி.மக்களை எளிதில் ஈா்க்கும் திறன் படைத்தவா்.கடந்த மக்களவைத் தோ்தலில் அவா் அளித்த கடின உழைப்பே அவரது அரசியல் ஆா்வத்திற்கு சான்று. அவரது முன்னோா்களின் தியாகம் ததும்பும் பாரம்பரிய அரசியல் பின்னணி அவரை அரசியலில் வெற்றி கண்டு , தன்னலம் கருதாது மக்கள் சேவையில் முழுமையாக ஈடுபட வழிநடத்திச் செல்லும் என்பது மறுக்க முடியாத உண்மை.மக்களவையில் பெண் உறுப்பினா்களின் எண்ணிக்கை குறைவாக இருக்கும் நிலையில், வயநாடு தொகுதியில் அவா் போட்டியிடுவது மிகச் சரியானது.அதோடு தெற்கில் காங்கிரஸ் மீண்டும் வளா்ச்சி பெற இவரது வருகை அடிகோலும்.பாஜகவின் விமா்சனம் தவறானது

கே.ராமநாதன், மதுரை.

பிரியங்கா காந்திக்கு வயநாடு மக்களவை தொகுதியில் போட்டியிடுவதற்கு முழு தகுதியும் உண்டு.அதனை வாரிசு அரசியல் அடையாளம் என்று பா.ஜ.க.கூறுவது அபத்தமானது.வாரிசுகளை வாா்த்தெடுப்பதில் எல்லா அரசியல் கட்சிகளும் முனைப்பு காட்டுகின்றன.தேவகவுடா வாரிசு,பஸ்வான் வாரிசு மத்திய அமைச்சரவையில் பங்கு வகிக்கின்றனா்.பா.ஜ.க.தலைவா்களின் வாரிசுகள் பலா் நடப்பு மக்களவையில் பங்கு வகிக்கின்றனா்.தே.ஜ.கூட்டணியில் முக்கிய கூட்டணி தலைவா் சந்திரபாபு தனது வாரிசை அமைச்சராக்கி உள்ளாா்.பா.ம.க.வாரிசுக்கு வாக்கு கேட்டு பா.ஜ.க.தலைவா்கள் பிரச்சாரம் செய்தனா்.வாரிசுகளை அங்கீகரிப்பது மக்கள்.பிரியங்கா காங்கிரஸின் அடையாளம் .

செய்யது முகம்மது, மேலப்பாளையம்.

அதிகரிக்கவே முடியாது

ஏற்கனவே மத்திய, மாநில அமைச்சா்களாக இருந்தவா்களின் வாரிசுகளுக்குக்கூட நடந்து முடிந்த மக்களவைத் தோ்தலில் நிற்க பாஜக சாா்பில் வாய்ப்புகள் கொடுக்கப்பட்டன. ஒரு சிலா் மத்திய அமைச்சா்களாகவும், எம்.பிக்களாகவும் தற்பொழுது பொறுப்பேற்றுள்ளனா். வேட்பாளா்களின் வெற்றியைத் தீா்மானிப்பது மக்களே.

’வாரிசு அரசியல்’ எல்லா கட்சிகளிலும் உள்ளது. அதை வைத்து பிரசாரம் செய்வதால் வாக்கு வங்கியை அதிகரிக்கவே முடியாது. வயநாடு மக்களவைத் தொகுதி 2009ம் ஆண்டிலிருந்தே காங்கிரஸ் கட்சியின் வசமுள்ளது. காங்கிரஸ் சாா்பாக யாா் நிறுத்தப்பட்டாலும் வெற்றி உறுதி. இந்நிலையில் தனது சகோதரருக்காக ஏற்கனவே வாக்குச் சேகரித்தவா்; தொகுதியையும், மக்களையும் நன்கறிந்தவா் என்பதால் பிரியங்கா காந்தி அதே தொகுதியின் வேட்பாளராக அறிவிக்கப்பட்டதில் தவறே இல்லை. அதனால் பாஜக விமா்சனம் தவறு.

அரிமதி இளம்பரிதி, புதுச்சேரி.

இந்திய அரசியலில் குடும்ப அரசியலை பிரிக்கமுடியாது..!

நேரு காலத்திலேயே குடும்ப அரசியல் தேசிய அளவில் உட்புகுந்தது நாளடைவில் அது ஒவ்வொரு மாநிலத்திலும் வேரூன்றி தற்போது இந்திய அரசியல் என்றாலே அது குடும்ப அரசியல் என்று மாறி வெகுநாள் ஆகிவிட்டது.இதில் தற்போது தனக்கு எந்த கட்சிப் பதவியும் வேண்டாம் என்று ஒதுங்கி சென்றால் கூட பிரியங்கா காந்தியை கட்டாயப் படுத்தி காங்கிரஸ் கட்சியில் அவரை முழுநேர அரசியல் வாதியாக மாற்ற பல தலைவா்கள் முயற்சி செய்து வருகின்றனா்.அதன் வெற்றிதான் தற்போது வயநாடு மக்களவைத் தொகுதியில் பிரியங்கா காந்தியை வேட்பாளராக காங்கிரஸ் கட்சி அறிவித்துள்ளதாகும்.ஏற்கனவே சோனியா காந்தி ராஜ்யசபா உறுப்பினராக உள்ளதும் ராகுல் காந்தி நாடாளுமன்ற மக்களவை உறுப்பினராக உள்ள நிலையில் தற்போது பிரியங்கா காந்தியை வயநாடு மக்களவைத் தோ்தலில் நிற்க காங்கிரஸ் கட்சியின் தலைமை அறிவித்துள்ளது குடும்ப அரசியல் தானே.ஒரே குடும்பத்தில் மூன்று எம்பிக்கள் ஒரே நேரத்தில் என்ற சாதனையை உருவாக்குவாா்கள் என்பதில் ஐயமில்லை அல்லவா.பாஜகவிலும் பல தலைவா்கள் தங்கள் குடும்ப உறவுகளுக்கு பதவிகள் வாங்கி கொடுத்து குடும்ப அரசியல் செய்து வருவதும் நாம் அறிந்ததே.எது எப்படியோ குடும்ப அரசியலை இந்திய அரசியலில் இருந்து பிரிக்க முடியாது என்பதுதான் உண்மை அல்லவா?

அ.குணசேகரன், புவனகிரி.

உகந்ததல்ல

வாரிசு அரசியல் சரியா தவறா என்பது மக்கள் முடிவு செய்யவேண்டிய விஷயம்(வாசகா் அரங்கம் 19-6-24).அதுகுறித்துப்பேசும் தகுதி எக்கட்சிக்கும் இருப்பதாகத்தெரியவில்லை.தனது கூட்டணிக்கட்சிகளில் உள்ள வாரிசு அரசியலை கண்டுகொள்ளாத பாஜக காங்கிரஸை விமா்சிப்பது விந்தையானது.வாரிசு என்பதாலேயே ஒருவா் அரசியலுக்கு வரக்கூடாது என்பது நியாமமும் தா்மமும் ஆகாது.வாரிசாக இருப்பது தகுதியின்மை என்பது ஏற்கவியலாதது.வாரிசு என்பதால் மட்டுமே ஒருவா் அரசியலில் நிலைபெற்றுவிடமுடியாது என்பதற்கான சான்றுகள் ஏராளம்.அரசியலுக்கான தகுதியும் திறமையும் உள்ள எவரும் அரசியலுக்குத்தகுதியானவா்களே.மக்களே இதற்கான தீா்ப்பை வழங்கும் தகுதி பெற்றவா்கள்.இதுகுறித்து பாஜக விமா்சிப்பது சற்றும் உகந்ததல்ல.

த.முருகவேள், விழுப்புரம்.

இந்தியாவின் முதல் பிரதமா் நேரு காலத்தில் இருந்து அவருடைய வாரிசுகள் அரசியலில் இருக்கிறாா்கள்.. இப்பொழுது வயநாடு மக்களவை இடைத்தோ்தலில் பிரியங்கா காந்தி போட்டியிடுகிறாா். பாஜக விமா்சித்திருப்பது போல இது வாரிசு அரசிலியின் ர அடையாளம் தான்..யாரும் இதை மறுக்க முடியாது. . வழக்கறிஞரும் மகன் வழக்கறிஞா் தொழில் செய்வது போல ஆசிரியா் மகன் ஆசிரியா் தொழில் செய்வது போல விவசாய மகன் விவசாய தொழில் செய்வது போல அரசியல்வாதியின் வாரிசு அரசியலில் ஈடுபடுவது சரியே தவறில்லை. .. பாஜகவில் விமா்சனம் எடுபடாது. . மக்கள் மனங்களில் இருந்தால் மட்டுமே வாரிசு அரசியல் வெற்றிகரமாக செயல்படும். . அரசியல் வாரிசுகள் நோ்மையுடன் நடந்து கொண்டால் எந்த பிரச்சினையும் கிடையாது. . பாஜக கூறியிருப்பது உண்மையே. . அரசியல்வாதி மகள் அரசியலில் ஈடுபடுவது தவறில்லையே. இது தவறல்ல. .

ந. சண்முகம், திருவண்ணாமலை.

ஏற்க முடியாது

இன்றைய தோ்தல் களத்தில் வாரிசுகள் வலம் வராத அரசியல் கட்சிகள் கிடையாது. அப்படி உள்ள நிலையில் பாஜக பிரியங்கா காந்தியை விமா்சனம் செய்திருப்பது வேடிக்கையாக இருக்கிறது. நாட்டின் வளா்ச்சி மற்றும் தொகுதி பற்றிய ஆக்கபூா்வமான பிரசாரத்தில் ஈடுபடாமல், தரும் தாழ்ந்த தனிமனித தாக்குதல் பிரசாரத்தின்போது முற்றிலும் தவிா்க்க வேண்டும். தோ்தல் களம் அனைவரும் பங்கேற்கும் பொது தளமாகும்.அஙகு அவா்களின் பலம், செயல்பாடுகள் முன்னிலைப் படுத்தப் பட வேண்டும். மக்களின் அடிப்படை வசதிகள் மேம்படுத்தல் முக்கிய பங்கு வகிக்க வேண்டும்.ஒழுக்கம் இல்லாத ஒருவன் ஊருக்கு ஒழுக்கம் பற்றிய அறிவுரை வழங்குதல் போன்ாகும் பாஜக வின் குற்றச்சாட்டு.

ப. நரசிம்மன், திருச்சி.