பிகாா்: எம்எல்ஏவுக்கு எதிராக அமைச்சா் அவதூறு நோட்டீஸ்

பிகாரில் முதல்வா் நிதீஷ் குமாா் தலைமையிலான ஐக்கிய ஜனதா தளம் (ஜேடியு) கட்சியில் பெண் எம்எல்ஏ ஒருவருக்கு எதிராகப் பெண் அமைச்சா் ஒருவா் அவதூறு நோட்டீஸ் அனுப்பியுள்ளது அந்த மாநில அரசியல் வட்டாரத்தில் பரபரப்பை ஏற்படுத்தியுள்ளது.

பிகாரில் அண்மையில் பாஜக கூட்டணியில் இருந்து விலகிய ஐக்கிய ஜனதா தளம் தலைவா் நிதீஷ் குமாா், ராஷ்ட்ரீய ஜனதா தளம், காங்கிரஸ் உள்ளிட்ட கட்சிகளுடன் இணைந்து ஆட்சி அமைத்தாா். இதன் மூலம் முதல்வா் பதவியையும் நிதீஷ் குமாா் தக்கவைத்துக் கொண்டாா்.

இந்நிலையில், பிகாரின் புதிய ஆட்சியை எதிா்க்கட்சியான பாஜக தொடா்ந்து விமா்சித்து வருகிறது. குற்றப் பின்னணி உள்ள பலருக்கு அமைச்சரவையில் இடம் அளிக்கப்பட்டதை அண்மையில் விமா்சித்த பாஜக, பிகாரில் மீண்டும் காட்டாட்சி தொடங்கிவிட்டது என்று கூறியிருந்தது.

இந்நிலையில், நிதீஷ் கட்சியைச் சோ்ந்த மாநில உணவு மற்றும் நுகா்வோா் பாதுகாப்புத் துறை அமைச்சா் லெசி சிங், தனது கட்சி எம்எல்ஏவான பீமா பாரதிக்கு எதிராக அவதூறு நோட்டீஸ் அனுப்பியுள்ளாா். பொது வெளியில் ஆதாரம் ஏதும் இல்லாமல் தன் மீது அவதூறு பரப்பும் நோக்கில் பல்வேறு குற்றச்சாட்டுகளை பீமா பாரதி சுமத்தி வருவதாக லெசி சிங் குற்றம்சாட்டியுள்ளாா்.

பீமா பாரதியும் முன்பு அமைச்சராக இருந்தவா். பீமா பாரதி மற்றும் அமைச்சா் லெசி சிங் ஆகியோரின் தொகுதிகள் ஒரே மாவட்டத்தில் அடுத்தடுத்து அமைந்துள்ளன.

அண்மையில் நிதீஷ் குமாா் கூட்டணி மாறியபோது லெசி சிங்குக்கு அமைச்சா் பதவி அளிக்கப்பட்டது. பீமா பாரதியும் அமைச்சா் பதவியை எதிா்பாா்த்திருந்த நிலையில் அவருக்குப் பதவி கிடைக்கவில்லை. இதைத் தொடா்ந்து பொதுக்கூட்டம் ஒன்றில் பேசிய பீமா பாரதி, அமைச்சா் லெசி சிங்குக்கு எதிராகப் பல்வேறு கிரிமினல் குற்றச்சாட்டுகளை முன்வைத்தாா். ஏற்கெனவே, குற்றப் பின்னணி உள்ளவா்கள் அமைச்சா்களாகியுள்ளனா் என்று பாஜக விமா்சித்து வந்த நிலையில், நிதீஷ் கட்சியைச் சோ்ந்த எம்எல்ஏ ஒருவரே சக கட்சி அமைச்சா் மீது குற்றச்சாட்டுகளைக் கூறியது பிரச்னையை அதிகமாக்கியது.

இந்நிலையில், பீமா பாரதியிடம் ரூ.5 கோடி நஷ்டஈடு கேட்டு அமைச்சா் லெசி சிங் நோட்டீஸ் அனுப்பியுள்ளாா். இது ஐக்கிய ஜனதா தளத்தில் பிரச்னையை மேலும் அதிகரித்துள்ளது. இந்த நோட்டீஸ் தொடா்பாக பதிலளிக்க பீமா பாரதி மறுத்துவிட்டாா். அமைச்சருடனான பிரச்னை குறித்து கட்சித் தலைமையிடம் விளக்கம் அளித்துவிட்டதாகவும் அவா் தெரிவித்தாா்.

முன்னதாக, இந்த இரு பெண் தலைவா்கள் இடையிலான மோதல் குறித்த கேள்விக்கு பதிலளித்த நிதீஷ் குமாா், ‘அமைச்சா் லெசி சிங் மீது எவ்வித குற்றச்சாட்டும் இல்லை. பீமா பாரதி முன்பு அமைச்சராக இருந்தவா்தான். கட்சி அளவில் அவா் பிரச்னையைத் தீா்த்துக் கொள்ள முடியும். அதையும் மீறி பீமா பாரதி செயல்பட விரும்பினால் கட்சியில் இருந்து வெளியேறலாம்’ என்று கூறியது குறிப்பிடத்தக்கது.

இது அமைச்சருக்கும், எம்எல்ஏவுக்கும் உள்ள தனிப்பட்ட பிரச்னை. இருவரும் ஐக்கிய ஜனதா தளம் கட்சியில் தொடா்வதில் உறுதியாக உள்ளனா். இதனால், மாநில அரசுக்கு எந்தப் பிரச்னையும் ஏற்படாது என்று அக்கட்சியைச் சோ்ந்த மூத்த அமைச்சா் விஜய்குமாா் சௌதரி தெரிவித்தாா்.