மேற்கு வங்க மாநிலம் கொல்கத்தாவில் 1 லட்சம் போ் இணைந்து பகவத் கீதை பாராயணம் செய்யும் நிகழ்ச்சியில் பிரதமா் மோடி பங்கேற்க உள்ளாா் என அம்மாநில பாஜக தலைவா் சுகாந்த மஜும்தாா் தெரிவித்தாா்.

இது தொடா்பாக சுகாந்த மஜும்தாா் திங்கள்கிழமை செய்தியாளா்களிடம் கூறியதாவது: கொல்கத்தாவில் 1 லட்சம் போ் பங்குபெற்று பகவத் கீதை பாராயணம் செய்யும் நிகழ்ச்சி டிசம்பா் 24-ஆம் தேதி நடைபெறவுள்ளது. இந்நிகழ்ச்சியில் கலந்துகொள்ளுமாறு பிரதமா் மோடிக்கு அழைப்பு விடுக்கப்பட்டுள்ளது. அழைப்பை ஏற்றுக் கொண்ட பிரதமா் மோடி நிகழ்ச்சியில் பங்கேற்பதாக தெரிவித்தாா்.

இதை அரசியல் நிகழ்வாக எண்ணக் கூடாது. ஏனெனில் இந்நிகழ்ச்சியை பாஜக ஏற்பாடு செய்யவில்லை. சில மதரீதியிலான அமைப்புகள் ஒன்றிணைந்து நிகழ்ச்சியை நடத்தவுள்ளன. மாநில முதல்வா் மம்தா பானா்ஜி, ஆளுநா் சி.வி.ஆனந்தபோஸ் உள்ளிட்டோருக்கும் அழைப்பு விடுக்கப்பட்டுள்ளது என்றாா் அவா்.

இந்நிகழ்ச்சி குறித்து திரிணமூல் காங்கிரஸ் செய்தித்தொடா்பாளா் குணால் கோஷ் கூறுகையில்,‘மக்களவைத் தோ்தலை மனதில் வைத்து பாஜகவால் இந்நிகழ்ச்சி ஏற்பாடு செய்யப்பட்டுள்ளது. 2019 மக்களவைத் தோ்தல், 2021 பேரவைத் தோ்தலின்போதும் பாஜகவின் முன்னணி தலைவா்கள் அடிக்கடி மாநிலத்தில் சுற்றுப்பயணம் மேற்கொண்டனா். ஆனால் எந்த மாற்றமும் ஏற்படவில்லை’ என்றாா்.