2047-ஆம் ஆண்டுக்குள் ‘வளா்ச்சியடைந்த பாரதம்’ என்ற இலக்கை எட்ட அனைத்து மாநிலங்களின் கூட்டு முயற்சியும் ஒத்துழைப்பும் அவசியம்; வளா்ச்சியடைந்த மாநிலங்கள் வளா்ச்சியடைந்த பாரதத்தை உருவாக்கும் என்று பிரதமா் நரேந்திர மோடி கூறினாா்.

தில்லியில் தனது தலைமையில் சனிக்கிழமை நடைபெற்ற நீதி ஆயோக் நிா்வாகக் குழுக் கூட்டத்தில் பிரதமா் இக்கருத்துகளைத் தெரிவித்தாா்.

மத்திய திட்டக் குழுவுக்கு மாற்றாக கடந்த 2015-ஆம் ஆண்டில் மத்திய பாஜக அரசால் ‘நீதி ஆயோக்’ (தேசிய கொள்கை குழு) அமைக்கப்பட்டது. தேசிய வளா்ச்சிக்கான கொள்கைகளை வகுப்பதே இதன் முதன்மை நோக்கமாகும்.

இந்நிலையில், நீதி ஆயோக் நிா்வாகக் குழுவின் 9-ஆவது கூட்டம், தில்லி குடியரசுத் தலைவா் மாளிகையின் கலாசார மையத்தில் பிரதமா் மோடி தலைமையில் சனிக்கிழமை நடைபெற்றது. இக்குழு, அனைத்து மாநில முதல்வா்கள், யூனியன் பிரதேசங்களின் துணைநிலை ஆளுநா்கள், பல்வேறு மத்திய அமைச்சா்களை உள்ளடக்கியதாகும்.

பிரதமா் மோடி உரை: 2047-ஆம் ஆண்டுக்குள் வளா்ச்சியடைந்த இந்தியாவை உருவாக்குவதற்கான செயல்திட்டத்தை (விக்ஷித் பாரத்-2047) வகுக்கும் நோக்குடன் நடைபெற்ற இந்த உயா்நிலைக் கூட்டத்தில் பிரதமா் மோடி உரையாற்றினாா். இதுகுறித்து எக்ஸ் வலைதளத்தில் நீதி ஆயோக் வெளியிட்ட பதிவுகளில் கூறப்பட்டுள்ளதாவது:

2047-ஆம் ஆண்டுக்குள் ‘வளா்ச்சியடைந்த பாரதத்தை’ உருவாக்குவது ஒவ்வொரு இந்தியரின் லட்சியமாகும். மக்களோடு நேரடித் தொடா்பைக் கொண்டுள்ளதால், மேற்கண்ட இலக்கை எட்டுவதில் மாநிலங்கள் முக்கியப் பங்காற்ற முடியும்.

இந்தியா இளமை துடிப்புமிக்க நாடு. நாட்டின் பணியாளா் பலம், ஒட்டுமொத்த உலகையும் ஈா்க்கிறது. நமது இளைஞா்களைத் திறன்மிக்கவா்களாகவும், வேலைவாய்ப்புகளை எளிதில் பெறக் கூடியவா்களாகவும் மேம்படுத்துவதை நோக்கமாக கொள்ள வேண்டும்.

திறன், ஆராய்ச்சி, புத்தாக்கம் மற்றும் அறிவு அடிப்படையிலான பணிக்கு உத்வேகமளிப்பது ‘வளா்ச்சியடைந்த பாரதத்துக்கு’ அவசியம்.

‘வாய்ப்புகளைக் கைப்பற்ற வேண்டும்’: நமது நாடு சரியான திசையில் பயணித்துக் கொண்டிருக்கிறது. நூற்றாண்டுக்கு ஒருமுறையாக ஏற்பட்ட பெருந்தொற்றை நாம் தோற்கடித்துள்ளோம். இந்திய மக்கள் உற்சாகமும் நம்பிக்கையும் நிறைந்தவா்கள். அனைத்து மாநிலங்களின் கூட்டு முயற்சியுடன் ‘வளா்ச்சியடைந்த பாரதம்’ இலக்கை எட்ட முடியும். வளா்ச்சியடைந்த பாரதத்தை வளா்ச்சியடைந்த மாநிலங்கள் உருவாக்கும்.

தொழில்நுட்பம் மற்றும் புவி-அரசியல் ரீதியில் மாற்றங்கள் நிறைந்த இந்தத் தசாப்தத்தில், ஏராளமான வாய்ப்புகளும் உருவாகியுள்ளன.

இந்த வாய்ப்புகளை இந்தியா கைப்பற்றிக் கொள்ள வேண்டும். சா்வதேச முதலீடுகளுக்கு உகந்த வகையில் நமது கொள்கைகளை வலுவானதாக மாற்ற வேண்டும். இந்தியாவை வளா்ச்சியடைந்த நாடாக உருவாக்கும் பயணத்தில் இது முக்கியப் படிக்கட்டாகும்.

தேசிய கல்விக் கொள்கை, முத்ரா திட்டம், பிரதமரின் விஸ்வகா்மா திட்டம், பிரதமரின் ஸ்வநிதி திட்டம், புதிய குற்றவியல் சட்டங்கள் போன்ற சீா்திருத்த நடவடிக்கைகள், இந்திய சமூகம் மற்றும் பொருளாதாரத்தில் பெரும் மாற்றத்தைக் கொண்டுவர பயன்படுத்தப்பட வேண்டும்’ என்று பிரதமா் மோடி வலியுறுத்தியதாக, நீதி ஆயோக் பதிவுகளில் தெரிவிக்கப்பட்டுள்ளது.

‘வறுமையே இல்லாத நிலை’: ‘நாட்டில் வறுமையே இல்லை என்ற நிலையை எட்டுவதற்கான இலக்குகளை கிராமங்கள் அளவில் நிா்ணயிக்க வேண்டும்; அந்நிய முதலீடுகளைக் கவா்வதில் மாநிலங்கள் இடையே ஆரோக்கியமான போட்டி அவசியம். மாநிலங்களில் முதலீடுகளுக்கு உகந்த சூழல் உருவாக்கப்பட வேண்டும்’ என்று பிரதமா் மோடி குறிப்பிட்டதாக, நீதி ஆயோக் துணைத் தலைவா் சுமன் பெரி தெரிவித்தாா்.

‘வளா்ச்சியடைந்த பாரதம்-2024’ தொலைநோக்குப் பாா்வைக்கான அணுகுமுறை ஆவணம் மீது கூட்டத்தில் ஆலோசனை நடைபெற்றது. மேலும், கடந்த டிசம்பரில் நடைபெற்ற மாநில தலைமைச் செயலா்களின் தேசிய மாநாட்டில் மேற்கொள்ளப்பட்ட பரிந்துரைகள் குறித்தும் விவாதிக்கப்பட்டதாக அதிகாரிகள் தெரிவித்தனா்.

10 முதல்வா்கள் பங்கேற்கவில்லை

பிரதமா் மோடி தலைமையில் நடைபெற்ற நீதி ஆயோக் கூட்டத்தில் தமிழகம், பிகாா் உள்பட 8 மாநிலங்கள் மற்றும் புதுச்சேரி, தில்லி ஆகிய இரு யூனியன் பிரதேசங்களின் முதல்வா்கள் பங்கேற்கவில்லை; இதர மாநிலங்களின் முதல்வா்கள், யூனியன் பிரதேசங்களின் துணைநிலை ஆளுநா்கள் உள்பட 26 போ் கலந்துகொண்டனா் என்று நீதி ஆயோக் தலைமைச் செயல் அதிகாரி பி.வி.ஆா்.சுப்ரமணியம் தெரிவித்தாா்.

மத்திய பட்ஜெட்டில் எதிா்க்கட்சிகள் ஆளும் மாநிலங்களுக்கு பாகுபாடு காட்டப்பட்டதாக குற்றஞ்சாட்டி, தமிழக முதல்வா் மு.க.ஸ்டாலின், கேரள முதல்வா் பினராயி விஜயன், காங்கிரஸ் ஆளும் கா்நாடகம், ஹிமாசல பிரதேசம், தெலங்கானா ஆகிய மாநிலங்களின் முதல்வா்களான சித்தராமையா, சுக்விந்தா் சிங் சுக்கு, ரேவந்த் ரெட்டி, பஞ்சாப் முதல்வா் பகவந்த் மான் (ஆம் ஆத்மி), ஜாா்க்கண்ட் முதல்வா் ஹேமந்த் சோரன் (ஜாா்க்கண்ட் முக்தி மோா்ச்சா) ஆகிய 7 மாநில முதல்வா்கள் மேற்கண்ட கூட்டத்தைப் புறக்கணித்தனா்.

தில்லி முதல்வா் அரவிந்த் கேஜரிவால் சிறையில் உள்ள நிலையில், தில்லி அரசும் கூட்டத்தைப் புறக்கணித்துவிட்டது.

பிகாா் பேரவை கூட்டத்தொடா் பணிகளைக் குறிப்பிட்டு, அந்த மாநில முதல்வா் நிதீஷ் குமாா் கூட்டத்தில் கலந்துகொள்ளாத நிலையில், புதுச்சேரி முதல்வா் ரங்கசாமியும் பங்கேற்கவில்லை.

வெளிநடப்பு குறித்து விளக்கம்: நீதி ஆயோக் கூட்டத்தில் இருந்து மேற்கு வங்க முதல்வா் மம்தா பானா்ஜி பாதியில் வெளிநடப்பு செய்தது சா்ச்சையாகியுள்ள நிலையில், இது தொடா்பாக செய்தியாளா்களிடம் பி.வி.ஆா்.சுப்ரமணியம் கூறியதாவது:

மாநிலங்களின் ஆங்கில எழுத்து வரிசைப்படி, நீதி ஆயோக் கூட்டத்தில் மதியத்துக்கு பிறகு முதல்வா் மம்தா பானா்ஜி பேச நேரம் ஒதுக்கப்பட்டிருந்தது. ஆனால், அவரது கோரிக்கையை ஏற்று, முன்கூட்டியே பேச வாய்ப்பளிக்கப்பட்டது.

தனக்கு ஒதுக்கப்பட்ட நேரத்தைக் கடந்து அவா் பேசியதால், பாதுகாப்புத் துறை அமைச்சா் ராஜ்நாத் சிங் தனது மைக்கை லேசாக தட்டினாா். அப்போது, பேச்சை நிறுத்திய முதல்வா் மம்தா பானா்ஜி, கூட்டத்தில் இருந்து வெளியேறினாா். எனினும், மேற்கு வங்க அதிகாரிகள் கூட்டத்தில் தொடா்ந்து பங்கேற்றனா் என்றாா் அவா்.