மோடியின் ஓய்வுக்கு மறைமுக அறிவுரையா? அமித் ஷாவுக்கு ப.சிதம்பரம் கேள்வி

ஒடிஸா முதல்வர் நவீன் பட்நாயக்கின் ஓய்வு குறித்து பேசிய அமித் ஷா, பிரதமர் நரேந்திர மோடியின் ஓய்வுக்கு மறைமுகமாக அறிவுரை வழங்குகிறாரா என்று காங்கிரஸ் மூத்த தலைவர் ப.சிதம்பரம் கேள்வி எழுப்பியுள்ளார்.

ஒடிஸா மாநிலத்தில் செவ்வாய்க்கிழமை தேர்தல் பிரசாரத்தில் ஈடுபட்ட மத்திய உள்துறை அமைச்சர் அமித் ஷா, “77 வயதாகும் நவீன் பட்நாயக், வயது முதிர்வு மற்றும் உடல்நலக் குறைவு காரணமாக ஓய்வுபெற வேண்டும், பாஜக ஆட்சி அமைத்தால் ஒடியா மொழிப் பேசும் இளைஞரை முதல்வராக்குவோம்.” எனத் தெரிவித்தார்.

அமித் ஷாவின் கருத்தை விமர்சித்து எக்ஸ் தளத்தில் பதிவிட்டுள்ள ப. சிதம்பரம்,

”வயது முதிர்வின்(வயது 77) காரணமாக நவீன் பட்நாயக் ஓய்வுபெற வேண்டும் என்று அமித் ஷா கூறியுள்ளார், ஒருவேளை பாஜக ஆட்சி அமைத்தால் மோடிக்கு(73 வயது 7 மாதங்கள்) விடுக்கப்பட்ட அறிவுரையா?

பாஜக ஆட்சி அமைக்கவில்லை என்றால் அமித் ஷா மகிழ்ச்சியாக இருப்பார் எனத் தெரிகிறது. அவர் எதிர்க்கட்சித் தலைவராவார்.” எனத் தெரிவித்துள்ளார்.