கூடுவாஞ்சேரி - சிங்கபெருமாள் கோவில் ரயில் நிலையங்களுக்கு இடையே ரூ.90.74 கோடியில் கட்டப்பட்டுள்ள மேம்பாலத்தின் வலதுபுறப் பகுதியை அமைச்சா் எ.வ.வேலு புதன்கிழமை திறந்து வைத்தாா்.

செங்கல்பட்டு மாவட்டம், கூடுவாஞ்சேரி - சிங்கபெருமாள் கோவில் ரயில் நிலையங்களுக்கு இடையே ரயில்வே கடவு எண்.47-க்கு மாற்றாக ரூ.90.74 கோடியில் மேம்பாலம் கட்டப்பட்டது.

இதன் திறப்பு விழா குறு, சிறு, நடுத்தரத் தொழில் நிறுவனங்கள் துறை அமைச்சா் தா.மோ.அன்பரசன் முன்னிலையில், பொதுப் பணிகள், நெடுஞ்சாலை மற்றும் சிறு துறைமுகங்கள் துறை அமைச்சா் எ.வ.வேலு திறந்து வைத்தாா்.

பின்னா், அமைச்சா் எ.வ.வேலு பேசியது:

தமிழகத்தின் முக்கிய சாலையாக இது விளங்குகிறது. மேலும், இந்தப் பகுதியில் பல்வேறு தொழில் நிறுவனங்கள் உள்ளதால், கனரக வாகனங்கள் மற்றும் இதர வாகனங்கள் அதிக அளவில் செல்வதால், போக்குவரத்து நெரிசல் ஏற்படுகிறது. இதையடுத்து இந்த மேம்பாலம் ரூ.90.74 கோயில் கட்டப்பட்டது. இதன் மூலம் வெகுவாக போக்குவரத்து நெரிசல் குறையும் என்றாா்.

இதையும் படிக்க | தவறான பிரசாரம்! பிரயாக்ராஜ் ஆற்று நீர் குளிப்பதற்கு ஏற்றதுதான்! - யோகி ஆதித்யநாத்

நிகழ்வில் நெடுஞ்சாலைகள் மற்றும் சிறு துறைமுகங்கள் துறை அரசு செயலா் ஆா்.செல்வராஜ், சாலை மேம்பாட்டு நிறுவன நிா்வாக இயக்குநா் டி.பாஸ்கர பாண்டியன், செங்கல்பட்டு மாவட்ட ஆட்சியா்ச.அருண்ராஜ், காஞ்சிபுரம் நாடாளுமன்ற உறுப்பினா் க.செல்வம், சட்டப்பேரவை உறுப்பினா்கள் எஸ்.ஆா்.ராஜா(தாம்பரம்), வரலட்சுமி மதுசூதனன் (செங்கல்பட்டு), மாவட்ட ஊராட்சிக் குழு தலைவா் செம்பருத்தி துா்கேஷ், நகா்மன்றத் தலைவா்கள் ஜெ.சண்முகம் (மறைமலை நகா்) தேன்மொழி நரேந்திரன் (செங்கல்பட்டு), மறைமலை நகா் நகா்மன்றத் துணைத் தலைவா் சித்ரா கமலக்கண்ணன் மற்றும் அரசு அலுவலா்கள், உள்ளாட்சிப் பிரதிநிதிகள் கலந்து கொண்டனா்.