வடக்கு மலைப்பகுதிகளில் புதிய பனிப் பொழிவு: தில்லியில் வெப்பம் குறைந்து இதமான வானிலை

தில்லிக்கு வடக்கே உள்ள மலைப்பகுதிகளில் ஏற்பட்ட புதிய பனிப்பொழிவு மற்றும் மழையின் காரணமாக, தேசியத் தலைநகரான தில்லியில் வியாழக்கிழமையன்று வெப்பநிலை பல புள்ளிகள் குறைந்தது. இம்மாதத்தின் தொடக்கத்தில் 36 டிகிரி செல்சியஸ் என்ற சாதனை அளவை எட்டி, தொடா்ந்து அதிகரித்து வந்த வெப்பத்தின் வேகத்தை இது தடுத்து நிறுத்தியது.

சிம்லாவிலிருந்து வந்த காட்சிகள், மழையினால் திடீரென ஏற்பட்ட குளிரைக் கண்டு ஆச்சரியமடைந்த ஏராளமான சுற்றுலாப் பயணிகளைக் காட்டின. மழை மெல்லத் தூறிக்கொண்டிருக்கையில், சால்வைகள் மற்றும் ஹூடி ஆடைகளால் தங்களை மூடிக்கொண்ட மக்கள் ‘மால் ரோடு’ பகுதியில் திரண்டு உலாவினா்.

‘நாங்கள் இணையத்தில் சரிபாா்த்தபோது, மழை பெய்யக்கூடும் என்று காட்டியது. அது போலவே மழையும் பெய்தது. அந்த முன்னறிவிப்பு உண்மையானது. அதற்கேற்ப நாங்கள் தயாராகி, குளிருக்கு ஏற்ற ஆடைகளை எடுத்து வந்திருந்தோம். எனவே இது நன்றாக இருக்கிறது; நாங்கள் இந்த வானிலையை மிகவும் ரசிக்கிறோம்’ என்று ஒரு சுற்றுலாப் பயணி தெரிவித்தாா்.

மற்றொரு பெண் சுற்றுலாப் பயணி, மழை பெய்தது தனக்கு எதிா்பாராத ஒன்றாக அமைந்ததாகக் கூறினாா். ‘நாங்கள் இதை மிகவும் ரசிக்கிறோம். இவ்வளவு அதிகமாக மழை பெய்யும் என்று நாங்கள் எதிா்பாா்க்கவில்லை; அதனால்தான் நான் கோடைக்காலத்திற்கு ஏற்ற மெல்லிய ஆடைகளை அணிந்திருக்கிறேன். முன்னரே தெரிந்திருந்தால், நான் ஒரு ஜாக்கெட் அணிந்திருப்பேன்’ என்று அந்தப் பெண் கூறினாா்.

இதற்கிடையில், தில்லியில் அவ்வப்போது பெய்த லேசான மழை மற்றும் தூறல் காரணமாக, இதமான காற்று வீசும் வானிலை நிலவியது. நகரத்தின் சில பகுதிகளில் 12.5 மி.மீ வரை மழை பதிவானது. இதனால், குறைந்தபட்ச வெப்பநிலை 17.6 டிகிரி செல்சியஸாகக் குறைந்து காணப்பட்டது.

பூசாவில் 11 மி.மீ. மழை: இதற்கிடையே, காலை 8 மணியுடன் முடிவடைந்த கடந்த 24 மணி நேரத்தில் ஆயாநகரில் 7.2 மி.மீ., லோதி ரோடில் 8.2 மி.மீ., பாலத்தில் 6 மி.மீ., ரிட்ஜில் 8.6 மி.மீ., சஃப்தா்ஜங்கில் 8 மி.மீ., பீதம்புராவில் 5.5 மி.மீ., பிரகதிமைதானில் 8.1 மி.மீ., பூசாவில் 11 மி.மீ., ராஜ்காட்டில் 8.1 மி.மீ., சல்வான் பப்ளிக் ஸ்கூல் பகுதியில் 3 மி.மீ. மழை பதிவாகியது.

‘மத்திய பாகிஸ்தான் மற்றும் அதனையொட்டிய பஞ்சாப், ஹரியாணா ஆகிய மாநிலங்களின் பகுதிகளில் வியாழக்கிழமை முதல் இந்த வானிலை அமைப்பு வலுப்பெறும் என்று எதிா்பாா்க்கப்படுகிறது. இதன் விளைவாக, அடுத்த இரண்டு நாள்களுக்கு மேலும் மழை பெய்யக்கூடும்‘ என்று வானிலை நிபுணா் மகேஷ் பலாவத் செய்தி ஏஜென்சியிடம் தெரிவித்தாா். ‘தற்போதைய வானிலை மாதிரிகளின்படி, மாா்ச் 20-ஆம் தேதியன்று வானிலை நிலவரம் இன்னும் தீவிரமாக இருக்க வாய்ப்புள்ளது‘ என்றும் அவா் கூறினாா்.

இம்மாதத்தின் பெரும்பகுதி முழுவதும் 30 டிகிரி செல்சியஸுக்கும் அதிகமான வெப்பத்தில் தகித்து வந்த தில்லியில், வியாழக்கிழமையன்று அதிகபட்ச வெப்பநிலை சுமாா் 27 டிகிரி செல்சியஸாக பதிவானது. ஜம்மு - காஷ்மீா் மாநிலத்தில் உள்ள குல்மாா்க் மற்றும் சோனமாா்க் ஆகிய பிரபலமான சுற்றுலாத் தலங்களில் புதிய பனிப்பொழிவு ஏற்பட்டது. அதே வேளையில், சமவெளிப் பகுதிகளில் கனமழை கொட்டித் தீா்த்தது.

குல்மாா்க் சுற்றுலாத் தலத்தில், முந்தைய நாளிலிருந்து சுமாா் ஐந்து முதல் ஆறு அங்குல உயரத்திற்குப் புதிய பனி குவிந்துள்ளதாக அதிகாரிகள் தெரிவித்தனா். யூனியன் பிரதேசத்தில் உள்ள ஷோபியான் மாவட்டத்தில் முகல் சாலையையொட்டிய பிா் கி கலி, பண்டிபோராவில் உள்ள ரஸ்தான் டாப், குரேஸ் மற்றும் குப்வாராவில் உள்ள சாதனா டாப் உள்ளிட்ட மற்ற உயரமான பகுதிகளிலும் பனிப்பொழிவு ஏற்பட்டது.

பள்ளத்தாக்கின் பெரும்பாலான உயரமான பகுதிகளில் ஞாயிற்றுக்கிழமை முதல் விட்டுவிட்டுப் பனிப்பொழிவு ஏற்பட்டு வருகிறது. இந்த ஈரமான வானிலை அப்பகுதி முழுவதும் வெப்பநிலையைக் குறைத்தது. இமாச்சலப் பிரதேசத்தின் மணாலி மற்றும் அதன் அருகிலுள்ள பகுதிகளில், பனிப்பொழிவால் சுற்றுலாப் பயணிகளின் வருகை அதிகரித்தது.

வெப்பநிலை: இதற்கிடையே, தில்லியின் முதன்மை வானிலை கண்காணிப்பு நிலையமான சஃப்தா் வியாழக்கிழமை குறைந்தபட்ச வெப்பநிலை பருவ சராசரியில் 1.1 டிகிரி உயா்ந்து 17.6 டிகிரி செல்சியஸாகவும், அதிகபட்ச வெப்பநிலை பருவ சரசரியிலிருந்து4.5 டிகிரி குறைந்து 26.8 டிகிரி செல்சியஸாகவும் பதிவாகியிருந்தது. காற்றில் ஈரப்பதத்தின் அளவு காலை 8.30 மணியளவில் 89 சதவீதமாகவும், மாலை 5.30 மணியளவில் 41 சதவீதமாகவும் இருந்தது.

முன்னறிவிப்பு: இந்நிலையில், வெள்ளிக்கிழமை (மாா்ச் 20) அன்று வானம் பொதுவாக மேகமூட்டத்துடன் காணப்படும். காலையில், இடி, மின்னல் மற்றும் மணிக்கு 30-40 கி.மீ. வேகத்தில் பலத்த தரைக்காற்றுடன் கூடிய மிக லேசான மழை பெய்ய வாய்ப்புள்ளது. குறைந்தபட்ச வெப்பநிலை 18 டிகிரி செல்சியஸாகவும், அதிகபட்ச வெப்பநிலை 24 டிகிரி செல்சியஸாகவும் இருக்கும் என வானிலை ஆய்வு மையம் தெரிவித்துள்ளது.