ஆஸ்திரேலிய அணிக்கு முழு நேர பயிற்சியாளராக விருப்பமில்லை: ஸ்டீவ் வாஹ

மெல்போர்ன், ஜன.8: ஆஸ்திரேலிய கிரிக்கெட் அணிக்கு முழு நேர பயிற்சியாளராக விருப்பமில்லை என்று அணியின் முன்னாள் கேப்டன் ஸ்டீவ் வாஹ் தெரிவித்தார்.

 இதுகுறித்து செய்தி நிறுவனத்துக்கு வாஹ் அளித்த பேட்டி: ஆஷஸ் தொடரில் ஆஸ்திரேலியாவுக்கு ஏற்பட்ட தோல்வியை ஏற்றுக் கொள்ள முடியாதுதான். ஆனால் தோல்வியிலிருந்து ஆஸ்திரேலிய அணி மீளும்.

 ஆஸ்திரேலிய அணிக்கு கிரிக்கெட் பயிற்சியாளராகும் திட்டம் என்னிடம் இப்போது இல்லை.

 ஏற்கெனவே இப்போதுள்ள பயிற்சியாளரை மாற்றப் போவதாக செய்திகள் வந்துள்ளன. எனவே அடுத்த பயிற்சியாளர் யார் என்ற பட்டியலில் என்னுடைய பெயரும் கண்டிப்பாக இடம்பெற்றிருக்கும் என்று நம்புகிறேன்.

 ஆனால் முழு நேர பயிற்சியாளராக மாறும் திட்டம் என்னிடம் இல்லை. இப்போது நான் சமூக சேவை நிகழ்ச்சிகளில் கவனம் செலுத்தி வருகிறேன். மேலும் என்னுடைய தொழிலையும் கவனிக்க வேண்டியுள்ளது.

 குடும்பத்தையும் நான் நிர்வகிக்கவேண்டும். எனவே பயிற்சியாளர் பதவியை ஏற்க முடியாது. ஆனால் ஆஸ்திரேலிய அணி மீண்டு வர நான் உதவி செய்வேன். அதற்காக சில தொழில்நுட்ப பயிற்சிகளை அளிக்கத் தயாராக இருக்கிறேன்.

 ஆனால் இதை பகுதி நேரமாகத்தான் செய்ய முடியும். முழு நேரமாக என்னால் செய்ய முடியாது.

 ஆஸ்திரேலிய கிரிக்கெட் அணியை எனக்கு மிகவும் பிடிக்கும். அந்த அணிக்கு உதவவேண்டும் என்று நினைக்கிறேன். ஆனால் என்னுடைய தொழில், சமூக சேவை பணிகளால் என்னால் பயிற்சியாளராக இயலவில்லை.

 அணியில் இடம்பெற்றுள்ள சில வீரர்களைத் தொடர்புகொண்டு ஆலோசனைகளை வழங்கி வருகிறேன் என்றார் அவர்.