ஆஷஸ் வெற்றி: கொண்டாடி மகிழ்ந்த ஆஸி. வீரர்கள் (புகைப்படங்கள்)

இங்கிலாந்து எதிரான 5-வது டெஸ்டில் இன்னிங்ஸ் வெற்றியடைந்துள்ள ஆஸ்திரேலிய அணி, ஆஷஸ் தொடரை 4-0 என்கிற கணக்கில் வென்றுள்ளது.

இப்போட்டியில் டாஸ் வென்று முதலில் பேட் செய்த இங்கிலாந்து 346 ரன்கள் எடுத்தது. ஜோ ரூட் 83 ரன்கள் அடித்தார். ஆஸ்திரேலியாவின் பேட்ரிக் கம்மின்ஸ் 4 விக்கெட்டுகள் வீழ்த்தினார்.

ஆஷஸ் டெஸ்ட் கிரிக்கெட் தொடரின் கடைசி போட்டியில் ஆஸ்திரேலியா தனது முதல் இன்னிங்ஸில் 193 ஓவர்களில் 7 விக்கெட் இழப்புக்கு 649 ரன்கள் குவித்து டிக்ளேர் செய்தது. முதல் இன்னிங்ஸில் 303 ரன்கள் பின்தங்கிய நிலையில் 2-ஆவது இன்னிங்ஸைத் தொடங்கிய இங்கிலாந்து 4-ஆம் நாளான ஞாயிற்றுக்கிழமை முடிவில் 46 ஓவர்களில் 4 விக்கெட் இழப்புக்கு 93 ரன்கள் எடுத்தது.

ஆஸ்திரேலியாவின் முதல் இன்னிங்ஸ் ஸ்கோரை எட்ட கடைசி நாளான இன்று இங்கிலாந்து 210 ரன்கள் எடுக்க வேண்டிய நிலையில், அணியின் வசம் 6 விக்கெட்டுகளே இருந்தன. இந்நிலையில் இன்று 180 ரன்களுக்குள் அனைத்து விக்கெட்டுகளையும் இழந்து இன்னிங்ஸ் தோல்வியை அடைந்தது. ரூட் 58 ரன்கள் எடுத்து ரிடையர்ட் ஹர்ட் முறையில் வெளியேறினார். ஆஸ்திரேலியத் தரப்பில் கம்மின்ஸ் 4 விக்கெட்டுகளும் லயன் 3 விக்கெட்டுகளும் வீழ்த்தினார்கள். இதனால் ஆஸ்திரேலிய அணி இன்னிங்ஸ் மற்றும் 123 ரன்கள் வித்தியாசத்தில் 5-வது டெஸ்டை வென்று ஆஷஸ் தொடரை 4-0 என்கிற கணக்கில் வென்றுள்ளது.

5-வது டெஸ்ட் போட்டியின் ஆட்ட நாயகனான கம்மின்ஸும் தொடர் நாயகனாக ஸ்டீவ் ஸ்மித்தும் தேர்வு செய்யப்பட்டார்கள்.

ஆஹஸ் கோப்பையைக் கைப்பற்றிய ஆஸ்திரேலிய அணியினர், இந்த வெற்றியை மிகவும் கொண்டாடினார்கள். பரிசளிப்பு விழா முடிவடைந்தவுடன் ஆஷஸ் கோப்பையுடன் அனைவரும் இணைந்து புகைப்படங்களை எடுத்துக்கொண்டார்கள். ரசிகர்களிடமும் தங்கள் மகிழ்ச்சியைப் பகிர்ந்து கொண்டார்கள். இந்த வெற்றித் தருணத்தின் ஒவ்வொரு நிமிடத்தையும் அவர்கள் அனுபவித்தார்கள். 

அந்நிகழ்வுகளின் புகைப்படங்கள்: