பிறந்தநாள் வாழ்த்து: பிரதமர், முதல்வருக்கு ரஜினி நன்றி

பிறந்தநாள் வாழ்த்து தெரிவித்த பிரதமர் நரேந்திர மோடி, முதல்வர் எடப்பாடி கே. பழனிசாமி, எதிர்க்கட்சித் தலைவர் மு.க. ஸ்டாலின் உள்ளிட்டோருக்கு நடிகர் ரஜினிகாந்த் நன்றி தெரிவித்துள்ளார்.

ரஜினிகாந்த் இன்று (சனிக்கிழமை) தனது 70-வது பிறந்தநாளைக் கொண்டாடுகிறார். இதையொட்டி, ரஜினிகாந்துக்கு திரையுலகம் மட்டுமின்றி அரசியல் தலைவர்கள் பிறந்தநாள் வாழ்த்து தெரிவித்தனர்.

இந்த நிலையில், பிறந்தநாள் வாழ்த்து கூறிய பிரதமர் நரேந்திர மோடி, முதல்வர் எடப்பாடி கே. பழனிசாமி, துணை முதல்வர் ஓ. பன்னீர்செல்வம், எதிர்க்கட்சித் தலைவர் மு.க. ஸ்டாலின் உள்ளிட்டோருக்கு ரஜினிகாந்த் நன்றி தெரிவித்துள்ளார். மேலும் மத்திய மற்றும் மாநில அரசியல் நண்பர்களுக்கும், நலன் விரும்பிகளுக்கும், சக திரைக்கலைஞர்களுக்கும், ஊடக நண்பர்களுக்கும், ரசிகர்களுக்கும் நன்றி தெரிவிப்பதாக சுட்டுரைப் பதிவில் அவர் குறிப்பிட்டுள்ளார்.

நடிகர் ரஜினிகாந்த் வரும் ஜனவரியில் அரசியல் கட்சி தொடங்கப்போவதாக அறிவித்துள்ளது குறிப்பிடத்தக்கது.