வேளாண் சட்டத்தில் எந்தக் குழப்பமும் இல்லை. உற்பத்தியாளர்களுக்கு முழு சுதந்திரம் உள்ளது. வேளாண் சட்டம் கொண்டுவந்திருப்பது ஒரு சீர்திருத்த முயற்சி என்று மத்திய நிதியமைச்சர் நிர்மலா சீதாராமன் கூறியுள்ளார்.

சென்னை ராயப்பேட்டையில் இன்று மத்திய நிதியமைச்சர் நிர்மலா சீதாராமன் செய்தியாளர்களை சந்தித்து வேளாண் சட்டங்கள் குறித்து விளக்கம் அளித்தார்.

அப்போது அவர் கூறியதாவது, வேளாண் விளைபொருட்களை விளைவித்த விவசாயிக்கு, வேளாண் சட்டங்கள் மூலம் முழு சுதந்திரம் அளிக்கப்படுகிறது. மாநிலங்களுக்கு இடையே விவசாயப் பொருள்களை விற்பனை செய்யலாம். மாநில வேளாண் சந்தைகள் மாற்றப்படவில்லை.

எவ்வளவு பொருள்களை, எவ்வளவு விலைக்கு, யாரிடம் விற்பனை செய்வது என்பதை விவசாயிகளே முடிவு செய்யலாம். வேளாண் சட்டங்கள் மூலம் விவசாயிகளுக்கு முழு உரிமை வழங்கப்பட்டுள்ளது. வேளாண் சட்டங்கள் கொண்டு வந்திருப்பது ஒரு சீர்திருத்த முயற்சியே. விவசாயிகள் மீது விதிக்கப்பட்ட 8 முதல் 8.5 சதவீத வரி இனி இருக்காது என்றும் நிர்மலா சீதாராமன் கூறினார்.