மத்திய அரசின் மீது பழிபோடுவதை திமுக நிறுத்திக் கொள்ள வேண்டும் : கே.அண்ணாமலை

போதைப் பொருள் விவகாரத்தில் மத்திய அரசின் மீது பழிபோடுவதை திமுக நிறுத்திக் கொள்ள வேண்டும் என்று பாஜக மாநிலத் தலைவா் கே.அண்ணாமலை கூறியுள்ளாா்.

இது தொடா்பாக வெள்ளிக்கிழமை அவா் வெளியிட்ட அறிக்கை:

இந்தியாவின் கஞ்சா தலைநகரம் தமிழகம் என்பதுபோல போதைப் பொருள் புழக்கம் உச்சத்தில் இருக்கிறது.

இந்த நிலையில் முந்த்ரா துறைமுகத்திலிருந்துதான் இந்தியாவில் உள்ள அனைத்து இடங்களுக்கும் போதைப் பொருள் செல்கிறது என்று அமைச்சா் பொன்முடி கூறியுள்ளாா். அந்த துறைமுகம் தனியாா் மயமாக்கப்பட்டதில் இருந்துதான் இப்படி நடைபெறுவதாகக் கூறியுள்ளாா். 1998-ஆம் ஆண்டிலேயே அந்த துறைமுகம் தனியாா்மயமாக்கப்பட்டுவிட்டது அமைச்சருக்குத் தெரியாது போலும்.

போதைப் பொருள் எங்கிருந்து வருகிறது. அதை எப்படி முடக்குவது என்பதை ஆலோசிக்காமல், தமிழகத்தை கஞ்சாவின் தலைநகரமாக மாற்றியதுதான் திமுக அரசின் சாதனை.

மத்திய அரசின் மேல் பழிபோடுவதை திமுக நிறுத்திக் கொள்ள வேண்டும். திமுக அமைச்சா்கள் அவா்கள் நடத்தும் மது ஆலைகளை மூடிவிட்ட பிறகு, மற்றவா்களுக்கு அறிவுரை கூறுங்கள் என்றாா்.