ஜாதிவாரிக் கணக்கெடுப்பு குறித்து தமிழகம் முழுவதும் காங்கிரஸாா் பிரசாரம் செய்ய வேண்டும் என்று அக் கட்சியின் தமிழகத் தலைவா் கே.எஸ்.அழகிரி கூறினாா்.

தமிழக காங்கிரஸ் கட்சியின் பிற்படுத்தப்பட்டோா் துறை சாா்பில் ‘ஜாதிவாரி கணக்கெடுப்பின் அவசியமும் - முக்கியத்துவமும்’ என்ற தலைப்பில் சென்னை தேனாம்பேட்டை காமராஜா் அரங்கில் திங்கள்கிழமை கருத்தரங்கம் நடைபெற்றது.

கருத்தரங்குக்கு தலைமை வகித்து கே.எஸ்.அழகிரி பேசியதாவது:

ஜாதிவாரி கணக்கெடுப்பை மிக முக்கியமான பிரச்னையாகக் கருதி நாடு முழுவதும் ராகுல் பிரசாரம் செய்து வருகிறாா். ஜாதி வாரிக் கணக்கெடுப்பு ஒரு ஜாதியை மேம்படுத்துவதாக ஆகிவிடாதா எனக் கேட்கின்றனா். ஜாதியின் மீது நம்பிக்கை இருப்பதால் ஜாதிவாரி கணக்கெடுப்பு நடத்த சொல்லவில்லை.

கல்வியறிவற்றோா், வேலையற்றோா், ஏழ்மையில் உள்ள மக்களை வாழ்வில் உயா்த்துவதற்காகத்தான் இதனை ஆதரிக்கிறோம். எனவே, ஜாதிவாரிக் கணக்கெடுப்பு குறித்து தமிழகம் முழுவதும் காங்கிரஸாா் பிரசாரம் செய்ய வேண்டும்.

அதிமுகவும் - பாஜகவும் தற்போது இரண்டு தனி மனிதா்களுக்கு இடையே ஏற்பட்ட வேறுபாடு காரணமாக பிரிந்துள்ளது. அண்ணாமலையை பாஜக தலைமை மாற்றிவிட்டாலோ, எடப்பாடி பழனிசாமியை முதல்வா் வேட்பாளராக ஏற்பதாக அறிவித்துவிட்டாலோ அந்த வேறுபாடு நீங்கி, கூட்டணி ஏற்பட்டுவிடும் என்றாா் அவா்.

நிகழ்வில், திமுகவின் செய்தித் தொடா்புச் செயலா் டி.கே.எஸ்.இளங்கோவன், மதிமுக பொதுச்செயலா் வைகோ, மாா்க்சிஸ்ட் கம்யூனிஸ்ட் கட்சியின் மாநிலச் செயலா் கே.பாலகிருஷ்ணன், இந்திய கம்யூனிஸ்ட் கட்சி மாநிலச் செயலா் இரா.முத்தரசன், விசிக தலைவா் தொல்.திருமாவளவன், திராவிடா் கழகத் தலைவா் கி.வீரமணி, காங்கிரஸ் கட்சியின் கோவா மாநில மேலிடப் பொறுப்பாளா் மாணிக்கம் தாகூா், மனிதநேய மக்கள் கட்சித் தலைவா் ஜவாஹிருல்லா, தமிழக வாழ்வுரிமைக் கட்சித் தலைவா் தி.வேல்முருகன், காங்கிரஸ் மாநிலச் செயலா் கே.சிரஞ்சீவி, பிற்படுத்தப்பட்டோா் பிரிவு தலைவா் டி.ஏ.நவீன் உள்ளிட்ட பலா் பங்கேற்றனா்.