கள்ளக்குறிச்சி சம்பவம்: ஜூன் 26 -இல் அறிக்கை தாக்கல் செய்ய உயா்நீதிமன்றம் உத்தரவு

கள்ளக்குறிச்சியில் கள்ளச்சாராய விற்பனை தொடா்பாக அரசுக்கு புகாா்கள் அளித்தும் நடவடிக்கை எடுக்காதது ஏன் என தமிழக அரசுக்கு கேள்வி எழுப்பிய சென்னை உயா்நீதிமன்றம், கள்ளக்குறிச்சி, மரக்காணம் விஷச்சாராய மரணங்கள் தொடா்பாக எடுத்த நடவடிக்கைகள் குறித்து ஜூன் 26 ஆம் தேதி விரிவான அறிக்கை தாக்கல் செய்ய வேண்டும் என உத்தரவிட்டுள்ளது.

கள்ளக்குறிச்சி, கருணாபுரத்தில் கள்ளச்சாராய மரணம் தொடா்பாக சிபிஐ விசாரிக்க கோரி அதிமுக வழக்குரைஞா் அணியின் மாநில செயலா் இன்பதுரை தாக்கல் செய்திருந்த பொது நல வழக்கு, நீதிபதிகள் கிருஷ்ணகுமாா் மற்றும் குமரேஷ் பாபு அமா்வில் வெள்ளிக்கிழமை விசாரணைக்கு வந்தது. அப்போது, மனுதாரா் தரப்பில் ஆஜரான வழக்குரைஞா் செல்வம், ‘இந்த சம்பவம், ஒட்டுமொத்த அரசு இயந்திரமும் தோல்வியடைந்து விட்டதையே காட்டுகிறது. 2023 ஆம் ஆண்டில் மரக்காணத்தில் இதேபோல, கள்ளச்சாராயம் குடித்து பலா் உயிரிழந்தனா். அதன் தொடா்ச்சியாக கள்ளக்குறிச்சி தொகுதி எம்.எல்.ஏ. செந்தில் குமாரும், அப்பகுதி மக்களும், காவல் துறையிடம் புகாா் அளித்தனா். எம்.எல்.ஏ. செந்தில் குமாா் சட்டப்பேரவையில் கவன ஈா்ப்பு தீா்மானம் கொண்டு வந்தாா். இருப்பினும் எந்த நடவடிக்கையும் எடுக்கப்படவில்லை. இன்னமும் தங்கு தடையின்றி சாராய விற்பனை நடைபெற்று வருகிறது. கருணாபுரம் பகுதியில் 500 மக்கள் வசித்து வரும் நிலையில், 300 போ் வரை கள்ளச்சாராயத்தை அருந்தியுள்ளனா். அண்டை மாநிலமான புதுச்சேரியில் இருந்து எத்தனால் கொண்டு வரப்பட்டுள்ளதால், விசாரணையை சிபிஐ-க்கு மாற்ற வேண்டும்’ என வலியுறுத்தினாா்.

இந்த வாதத்துக்கு பதிலளித்த தமிழக அரசு தலைமை வழக்குரைஞா் பி.எஸ்.ராமன், ‘எதிா்காலத்தில் இதுபோன்ற நிகழ்வுகளைத் தடுக்க அனைத்து நடவடிக்கைகளும் எடுக்கப்பட்டுள்ளன. ஓய்வு பெற்ற நீதிபதி கோகுல்தாஸ் தலைமையில் ஆணையம் அமைக்கப்பட்டுள்ளது.கள்ளக்குறிச்சி சம்பவம் தொடா்பாக, நான்கு போ் கைது செய்யப்பட்டுள்ளனா். 117 போ் மருத்துவமனைகளில் அனுமதிக்கப்பட்டுள்ளனா். அவா்களில் 89 பேரின் நிலைமை சீராக உள்ளது.  மீதமுள்ளவா்களின் நிலைமை கவலைக்கிடமாக உள்ளது. மாவட்ட ஆட்சியா் இடமாற்றம் செய்யப்பட்டுள்ளாா். காவல் கண்காணிப்பாளரும், மதுவிலக்கு பிரிவு அதிகாரிகளும் பணியிடை நீக்கம் செய்யப்பட்டுள்ளனா்’ என விளக்கம் அளித்தாா்.

இதையடுத்து, ‘கடந்த 2023 ஆம் ஆண்டு மரக்காணம் சம்பவத்தை தொடா்ந்து, அரசின் கவனத்துக்கு இந்த விவகாரம் கொண்டு வந்த பிறகு, கடந்த ஓராண்டாக என்ன நடவடிக்கை எடுக்கப்பட்டது?. அந்த சம்பவத்தின் மூலம் ஏன் பாடம் கற்றுக் கொள்ளவில்லை?. கள்ளச்சாராய விற்பனை தொடா்பாக எத்தனை வழக்குகள் பதிவு செய்யப்பட்டுள்ளன?. இந்த சம்பவத்திற்கு முன்பு, கள்ளக்குறிச்சியில் கள்ளச்சாராய விற்பனை நடந்து வருவதாக ஊடகங்களில் செய்திகள் வெளியானது. அப்போது மாவட்ட நிா்வாகமும், காவல்துறையும் என்ன நடவடிக்கை எடுத்தது. அரசு நடவடிக்கை எடுத்திருந்தால் இந்த சம்பவம் தடுக்கப்பட்டிருக்கும்’ என்றனா்.

இதையடுத்து, கள்ளக்குறிச்சி, மரக்காணம் கள்ளச்சாராய மரணங்கள் தொடா்பான வழக்குகளில் எடுத்த நடவடிக்கைகள் குறித்து விரிவான அறிக்கையை தாக்கல் செய்ய வேண்டும் என, தமிழக அரசுக்கு உத்தரவிட்ட நீதிபதிகள், வழக்கின் விசாரணையை ஜூன் 26 ஆம் தேதிக்கு தள்ளிவைத்தனா்.