தமிழகத்துக்கு இன்று ஒருநாள் விடுமுறை: தமிழ்நாடு வெதர்மேன்

சென்னையில் கடந்த ஒரு சில நாள்களாகவே அவ்வப்போது லேசான மழை என்று தொடங்கி பலத்த மழை பெய்து வந்த நிலையில், இன்று தமிழகத்துக்கு ஒரு நாள் மழை விடுமுறை விட்டிருப்பதாக தமிழ்நாடு வெதர்மேன் தெரிவித்துள்ளார்.

தமிழகத்தில் வெள்ளியன்று, தென் தமிழகத்தில் அநேக இடங்களிலும், வட தமிழகத்தில் ஒரு சில இடங்களிலும், புதுவை மற்றும் காரைக்கால் பகுதிகளிலும் லேசானது முதல் மிதமான மழை பெய்துள்ளது.

சனிக்கிழமை, தமிழகத்தில் ஓரிரு இடங்களிலும், புதுவை மற்றும் காரைக்கால் பகுதிகளிலும், லேசானது முதல் மிதமான மழை பெய்யக்கூடும் என்று சென்னை வானிலை ஆய்வு மையம் தெரிவித்திருந்தது.

இதையும் படிக்க.. வெளிநாடுகளில் வேலை தேடத் தொடங்கிய அமெரிக்கர்கள்!

இந்த நிலையில், தமிழ்நாடு வெதர்மேன் தனது சமூக வலைதளப் பக்கத்தில் தெரிவித்திருப்பதாவது, தென் தமிழகத்தின் பெரும்பாலான மாவட்டங்களும், டெல்டா பகுதியும் நல்ல மழையைப் பெற்றுள்ளது. ஒட்டுமொத்தமாகப் பார்த்தால், தமிழகத்தில் டெல்டா மற்றும் கன்னியாகுமரி மாவட்டங்களில் ஒரு சில இடங்களைத் தவிர மற்ற அனைத்து மாவட்டங்களுக்கும் இன்று மழை ஒரு நாள் விடுமுறை அளித்திருக்கிறது.

அதேவேளையில், காஞ்சிபுரம், திருவள்ளூர், சென்னை, செங்கல்பட்டு மாவட்டங்களில் மழை விட்டு விட்டுப் பெய்யும் நிலையே இன்றும் தொடரும் என்று பதிவிட்டுள்ளார்.