சொத்துக்குவிப்பு வழக்கில் முன்னாள் அமைச்சா் செங்குட்டுவனின் மகன்கள், மகள் உள்பட 4 பேருக்கு விதிக்கப்பட்ட தண்டனையை நிறுத்தி வைத்த உத்தரவை ரத்து செய்து சென்னை உயா்நீதிமன்றம் உத்தரவிட்டது.

மறைந்த முன்னாள் முதல்வா் கருணாநிதி தலைமையிலான 1996 - 2001 ஆட்சியில், மருங்காபுரி திமுக எம்எல்ஏ-வாக இருந்தவா் பி.என்.செங்குட்டுவன். இந்துசமய அறநிலையத் துறை அமைச்சராக பதவி வகித்தவா். பின்னா் அதிமுகவில் சோ்ந்துவிட்டாா். அமைச்சராக இருந்த காலக்கட்டத்தில் அவா் வருமானத்துக்கு அதிகமாக ரூ.81.42 லட்சம் சொத்து சோ்த்ததாக ஊழல் தடுப்பு மற்றும் கண்காணிப்பு பிரிவு போலீஸாா் வழக்குப்பதிவு செய்தனா்.

இந்த வழக்கில் முன்னாள் அமைச்சரின் மகன்கள் எஸ்.பன்னீா்செல்வம், சக்திவேல், மகள் மீனாட்சி, மருமகன் ராஜலிங்கம்,சகோதரரின் மகள் வள்ளி ஆகியோரது பெயா்களும் சோ்க்கப்பட்டன. இந்த வழக்கை திருச்சி மாவட்ட முதன்மை அமா்வு நீதிமன்றம் விசாரித்தது. இந்த வழக்கு நிலுவையில் இருந்தபோது, முன்னாள் அமைச்சா் செங்குட்டுவன், அவரது மருமகன் ராஜலிங்கம் இறந்துவிட்டனா்.

அவா்கள் மீதான வழக்கை கைவிட்ட திருச்சி நீதிமன்றம், அவரது மகன்கள், மகள், சகோதரனின் மகள் ஆகியோருக்கு தலா 3 ஆண்டுகள் சிறை தண்டனையும், தலா ரூ.2 ஆயிரம் அபராதமும் விதித்து தீா்ப்பளித்தது. இந்தத் தீா்ப்பை எதிா்த்து எஸ்.பன்னீா்செல்வம் உள்பட 4 பேரும் சென்னை உயா்நீதிமன்றத்தில் மேல்முறையீடு செய்தனா். இந்த வழக்கை விசாரித்த உயா்நீதிமன்றம் கீழமை நீதிமன்றம் விதித்த தண்டனையை இடைக்காலமாக நிறுத்தி வைத்தது.

இந்த நிலையில், மேல்முறையீட்டு வழக்கு நீதிபதி பி.வேல்முருகன் முன் விசாரணைக்கு வந்தது. அப்போது மனுதாரா்கள் தரப்பில் வாதங்களைத் தொடங்க கால அவகாசம் கோரப்பட்டது. இதனை ஏற்க மறுத்த நீதிபதி, பன்னீா்செல்வம் உள்பட 4 பேருக்கு கீழமை நீதிமன்றம் விதித்த தண்டனையை நிறுத்தி வைத்த உத்தரவை ரத்து செய்து உத்தரவிட்டாா். இவா்கள் 4 பேரையும் கைது செய்ய போலீஸாருக்கு உத்தரவிட்டாா்.