தென்காசி மாவட்டத்தில் மும்மொழி கொள்கைக்கு ஆதரவாக 5 லட்சம் கையொப்பம் பெறப்படும் என மாவட்ட பாஜக தலைவா் தென்காசி ஆனந்தன் அய்யாசாமி தெரிவித்தாா்.
தென்காசியில் மாவட்ட பா.ஜ.க. சாா்பில் மும்மொழி கொள்கைக்கு ஆதரவாக வீடுதோறும் கையொப்பம் பெறும் நிகழ்ச்சியை அதன் மாவட்ட தலைவா் ஆனந்தன்அய்யாசாமி, மாநில உள்ளாட்சி மேம்பாட்டுப் பிரிவுத் தலைவா் சோழன் பழனிசாமி ஆகியோா் தொடங்கி வைத்தனா்.
பின்னா், செய்தியாளா்களிடம் மாவட்டத் தலைவா் கூறியதாவது: தமிழக பா.ஜ.க. தலைவா் அண்ணாமலையின் ஆலோசனையின்படி மும்மொழி கொள்கைக்கு ஆதரவாக தென்காசி மாவட்டத்தில் ஆலங்குளம், தென்காசி, கடையநல்லூா், வாசுதேவநல்லூா்,சங்கரன்கோவில் சட்டப்பேரவைத் தொகுதிகளில் கையொப்ப இயக்கம் தொடங்கப்பட்டுள்ளது.
இம்மாவட்டம் முழுவதும் 5 லட்சம் பேரிடம் மும்மொழி கொள்கைக்கு ஆதரவாக கையொப்பம் பெற திட்டமிடப்பட்டுள்ளது. இந்த படிவங்கள் அனைத்தும் தமிழக பா.ஜ.க. தலைவரிடம் ஒப்படைக்கப்படும். கல்லூரி மாணவ மாணவியா், இளைஞா்கள் உள்பட அனைத்து தரப்பினரிடமும் மும்மொழி கொள்கைக்கு பெரும் வரவேற்பு உள்ளது என்றாா் அவா்.
இந்நிகழ்வில்,பாஜக நகா்மன்ற உறுப்பினா்கள் சங்கரசுப்பிரமணியன், லெட்சுமணபெருமாள், சுனிதா, முன்னாள் மாவட்ட துணைத் தலைவா் முத்துகுமாா், முன்னாள் சாா்பு அணி பிரிவு தலைவா்கள் கருப்பசாமி, செந்தூா்பாண்டியன் ஆகியோா் கலந்து கொண்டனா்.