திருவள்ளூா் மாவட்ட அளவிலான தடகளப் போட்டியில் முதல் மூன்று இடங்களில் வென்றவா்களுக்கு பதக்கம், பாராட்டுச் சான்றிதழ்களை மாவட்ட தடகள சங்கத் தலைவா் எம்.கே.எஸ்.சிவகுமாா் வழங்கினாா்.

இந்திய தடகள சம்மேளனமும், இந்திய விளையாட்டு மேம்பாட்டு இணையமும் இணைந்து மத்திய ஆதரவுடன் நாட்டில் உள்ள ஒவ்வொரு மாவட்டத்திலும் திறமையான பெண் தடகள வீராங்கனைகளைக் கண்டறிந்து, அவா்களை சா்வதேச அளவில் பங்கேற்கச் செய்து வெற்றி பெறும் வகையில், அனைத்து வகையிலும் உதவி அளித்து வருகிறது.

அந்த வகையில், அஸ்மிதா லீகு என்ற பேரில் 14, 16 வயதுக்குள்பட்ட தடகள வீராங்கனைகளுக்கு தடகளப் போட்டிகள் நடத்தப்படுகிறது. இந்தப் போட்டிகள் நடத்துவதற்கு இந்தியா முழுவதும் 300 மாவட்டங்கள் தோ்வு செய்ததில், திருவள்ளூா் மாவட்டமும் ஒன்று என்பது குறிப்பிடத்தக்கது.

அதன்பேரில், திருவள்ளூா் மாவட்ட விளையாட்டு மைதானத்தில் 14, 16 வயது பிரிவுகளைச் சோ்ந்த மாணவிகள் பங்கேற்ற தடகளப் போட்டிகள் வெள்ளிக்கிழமை நடைபெற்றது. இதில், 200 மீ ஓட்டம், 600 மீ ஓட்டம், ஈட்டி எறிதல், இரும்பு குண்டு எறிதல், நீளம் தாண்டுதல், நின்று நீளம் தாண்டுதல் உள்ளிட்ட 7 வகையான போட்டிகளில் பல்வேறு பள்ளிகளைச் சோ்ந்த மாணவிகள் 200-க்கும் மேற்பட்டோா் கலந்து கொண்டனா்.

இதில் ஒவ்வொரு போட்டிகளிலும் முதல் 3 இடங்களை பிடித்த மாணவிகளுக்கு பதக்கம் வழங்கும் நிகழ்ச்சியில் திருவள்ளூா் மாவட்ட தடகள சங்கத்தின் தலைவரும், முன்னாள் ஒன்றியக் குழு தலைவருமான கே.எம்.எஸ்.சிவகுமாா் பாராட்டி தங்கம், வெள்ளி, வெண்கலம் ஆகிய பதக்கங்கள் மற்றும் சான்றிதழ்களை வழங்கினாா்.

நிகழ்ச்சிக்கான ஏற்பாடுகளை மாவட்ட தடகள சங்க செயலாளா் மோகன்பாபு, பொருளாளா் வெங்கடாஜலபதி, மகளிா் சங்க தலைவா் பிரியா மற்றும் நடுவா்கள் உள்ளிட்டோா் கலந்து கொண்டனா்.