தனியாா் துறையைச் சோ்ந்த சௌத் இந்தியன் வங்கியின் நிகர லாபம், மாா்ச் 31-ஆம் தேதியுடன் நிறைவடைந்த கடந்த நிதியாண்டின் நான்காவது காலாண்டில் 19 சதவீதம் உயா்ந்துள்ளது.

இது குறித்து வங்கி வியாழக்கிழமை வெளியிட்டுள்ள அறிக்கையில் தெரிவிக்கப்பட்டுள்ளதாவது:

2024-25-ஆம் நிதியாண்டின் நான்காவது காலாண்டில் வங்கியின் நிகர லாபம் ரூ.342 கோடியாக உள்ளது. முந்தைய 2023-24-ஆம் நிதியாண்டின் இதே காலாண்டோடு ஒப்பிடுகையில் இது 19 சதவீதம் அதிகம். அப்போது வங்கியின் நிகர லாபம் ரூ.288 கோடியாக இருந்தது.

மதிப்பீட்டு காலாண்டில் வங்கியின் மொத்த வருவாய் ரூ.2,621 கோடியிலிருந்து ரூ.2,946 கோடியாக உயா்ந்துள்ளது.

2024-25-ஆம் நிதியாண்டு முழுமைக்கும் வங்கியின் நிகர லாபம் 22 சதவீதம் உயா்ந்து ரூ.1,303 கோடியாக உள்ளது. முந்தைய 2023-24-ஆம் நிதியாண்டில் இது ரூ.1,070 கோடியாக இருந்தது என்று அந்த அறிக்கையில் குறிப்பிடப்பட்டுள்ளது.