"உங்கள் டிக்கெட் தான் உங்கள் விசா" என்ற திட்டத்தின் கீழ் 96 மணி நேரம் (4 நாள்கள்) சவுதி நாட்டின் பல்வேறு பகுதிகளுக்குச் சென்று வரலாம் என்ற புதிய சேவை திட்டத்தை சவுதி ஏர்லைன்ஸ் நிறுவனம் அறிவித்துள்ளது.

சவுதி அரேபிய விமான நிறுவனமான சவுதியா, விமான டிக்கெட் வைத்திருக்கும் பயணிகள் அதிகபட்சம் நான்கு நாள்களுக்கு (96 மணிநேரம்) சவுதி அரேபியாவின் பல்வேறு பகுதிகளுக்குச் செல்ல அனுமதிக்கப்படுவார்கள் என்று உள்ளூர் ஊடகங்கள் செய்தி வெளியிட்டுள்ளன. 

உம்ரா, ஹஜ் யாத்திரைக்காக சவுதி அரேபியா வருபவர்களுக்கு இந்த புதிய திட்டம் பயனளிக்கக் கூடியதாக இருக்கும் என்று கூறப்பட்டுள்ளது. 

இந்த திட்டம் குறித்து சவுதியாவின் செய்தித் தொடர்பாளர் கூறுகையில், சவுதி ஏர்லைன்ஸில் பயணிகள் ஆன்லைனில் விமான டிக்கெட்டுகளை முன்பதிவு செய்யும் போது, ​​அவர்களுக்கு விசா தேவையா இல்லையா என்று கேட்கப்படும். விசா தேவைப்படுபவர்கள் ஆம் என்று குறிப்பிட்டால் போதும் விமான டிக்கெட்டுடன் விசாவும் சேர்ந்து வந்துவிடும். 

இதையும் படிக்க | பாகிஸ்தானில் மின்சாரம் இல்லாமல் தவிக்கும் நகரங்கள்: நடுவழியில் நிற்கும் ரயில்கள்

"உங்கள் டிக்கெட் தான் உங்கள் விசா" என்ற திட்டத்தின் புதிய வகை விசாவைப் பயன்படுத்தி ஜித்தா விமான நிலையம் மட்டுமின்றி நாட்டில் உள்ள அனைத்து சர்வதேச விமான நிலையங்களிலும் நீங்கள் இறங்கலாம். பயணங்களை முடித்துக்கொண்டு உங்களுக்கு வசதியான விமான நிலையத்தில் இருந்து தாயகம் திரும்பலாம். 

டிக்கெட் வாங்கும்போது வேறு கட்டணங்கள் எதுவும் செலுத்தாமல் சுற்றுலா விசா வழங்கும் சேவை விரைவில் தொடங்கப்படும்.

நாட்டில் உள்ள அனைத்து சர்வதேச விமான நிலையங்களுக்கும் இந்த சேவை விரிவுபடுத்தப்படும் என அறிவிக்கப்பட்டுள்ளது.