இந்து சமய அறநிலையத் துறை சாா்பில் 27 புதிய திட்டப் பணிகளை முதல்வா் மு.க.ஸ்டாலின் தொடங்கி வைத்தாா். இதற்கான நிகழ்ச்சி தலைமைச் செயலகத்தில் திங்கள்கிழமை நடைபெற்றது.

இது குறித்து, தமிழக அரசின் சாா்பில் வெளியிடப்பட்ட செய்திக் குறிப்பு:

திருச்செந்தூா், சென்னிமலை, திருவண்ணாமலை, பழனி, ஸ்ரீரங்கம், பண்ணாரி உள்பட 13 இடங்களில் இந்து சமய அறநிலைத் துறைக்கான 13 முடிவுற்ற கட்டுமானப் பணிகள் மற்றும் 13 ஆய்வா் அலுவலகங்கள், காஞ்சிபுரம் மாவட்டம் திருநீா்மலை ரங்கநாதப் பெருமாள் கோயில் பணியாளா்களுக்கான குடியிருப்புகள் என 27 புதிய திட்டப் பணிகளை முதல்வா் மு.க.ஸ்டாலின் திறந்து வைத்தாா்.

அடிக்கல் நாட்டுதல்: கோவை மாவட்டம் மருதமலை சுப்பிரமணிய சுவாமி கோயிலில் பெருந்திட்ட வரைவுப் பணிகளின் கீழ், கோயில் மலைமேல் மற்றும் அடிவாரத்தில் பக்தா்களுக்கான அடிப்படை வசதிகள் ஏற்படுத்தப்பட உள்ளன.

இதேபோல, வேலூா் விரிஞ்சிபுரம் மாா்க்கபந்தீஸ்வரா் கோயில், நாமக்கல் குன்னமலை வல்லீஸ்வரா் கோயில், பெரம்பலூா் உதவி ஆணையா் அலுவலகம் ஆகியவை புதிதாகக் கட்டப்பட உள்ளன. அவற்றுக்கு தலைமைச் செயலகத்தில் இருந்து முதல்வா் அடிக்கல் நாட்டினாா்.

நிகழ்வில், இந்து சமய அறநிலையத் துறை அமைச்சா் பி.கே.சேகா்பாபு, தலைமைச் செயலா் நா.முருகானந்தம் உள்பட பலா் பங்கேற்றனா்.