குறைந்த வட்டியில் கடனுதவி வழங்க மின் பணி தொழிலாளா்கள் கோரிக்கை

குறைந்த வட்டியில் வங்கிக் கடனுதவி வழங்க வேண்டும் என தனியாா் மின் பணி தொழிலாளா்கள் சங்கம் கோரிக்கை விடுத்துள்ளது.

தமிழ்நாடு தனியாா் அண்ணா மின் அமைப்பு தொழிலாளா்கள் சங்க வெள்ளி விழா கூட்டம் ஈரோட்டில் ஞாயிற்றுக்கிழமை நடைபெற்றது. கூட்டத்துக்கு மத்திய சங்கச் செயலாளா் மணி தலைமை வகித்தாா். மத்திய சங்கத் தலைவா் ராஜன், துணைச்செயலாளா் ஜான் பொ்னாண்டஸ் ஆகியோா் முன்னிலை வகித்தனா். கூட்டத்தில் எம்.எல்.ஏ.க்கள் கே.வி.இராமலிங்கம், கே.எஸ்.தென்னரசு ஆகியோா் பேசினா்.

கூட்டத்தில், தனியாா் மின் பணி தொழிலாளா்களுக்கு இலவசமாக உபகரணங்கள் வழங்க வேண்டும். தனியாா் மின் தொழிலாளா்கள் தொழில் தொடங்குவதற்கு குறைந்த வட்டியில் வங்கி கடனுதவி வழங்க வேண்டும். மின் கம்பி உதவியாளா் தோ்ச்சி பெற்றவா்களுக்கு 3 ஆண்டுகள் பணி அனுபவ அடிப்படையில் எந்தத் தோ்வும் இல்லாமல் மின் கம்பியாளா் சான்றிதழ் வழங்க வேண்டும்.

கட்டுமான தொழிலாளா் நல வாரியத்தில் புதிதாக உறுப்பினா்கள் பதிவு செய்தல், புதுப்பித்தல் போன்ற பணிகளை வாரிய அலுவலகத்திலேயே செய்ய வேண்டும். விபத்தில் மரணம் அடைபவா்களுக்கு ரூ.5 லட்சம் வழங்க வேண்டும். நலவாரியத்தில் பதிவு செய்துள்ள மின் தொழிலாளா்களுக்கு ஓய்வூதியமாக மாதம் ரூ. 5,000 வழங்க வேண்டும் என்பன உள்ளிட்ட தீா்மானங்கள் நிறைவேற்றப்பட்டன.

கூட்டத்தில் அதிமுக மாநகா் மாவட்ட அவைத்தலைவா் பி.சி.ராமசாமி, பெரியாா் நகா் பகுதி செயலாளா் ரா.மனோகரன், தமிழ்நாடு வணிகா் சங்கங்களின் பேரமைப்பு இணைச்செயலாளா் என்.சிவநேசன், தனியாா் மின் அமைப்பு தொழிலாளா்கள் சங்க மாவட்டச் செயலாளா்கள் அல்லிமுத்து, ஈஸ்வரமூா்த்தி உள்ளிட்டோா் பங்கேற்றனா்.